मुंबईतल्या दादर येथील ऐतिहासिक छत्रपती शिवाजी महाराज पार्कवर यंदाही उद्धव बाळासाहेब ठाकरे यांच्या शिवसेनेचा पारंपरिक ‘दसरा मेळावा’ पार पडणार आहे. १९६६ सालापासून चालत आलेली ही परंपरा यंदाही कायम राहणार आहे. मुंबई महानगरपालिकेने ठाकरे गटाला दसरा मेळाव्यासाठी अधिकृत परवानगी दिली आहे. शिवसेना खासदार अनिल देसाई यांनी अर्ज केल्यानंतर पालिकेच्या जी-उत्तर विभागाने ही मंजुरी दिली आहे. मात्र, ही परवानगी सहजासहजी मिळालेली नाही तर त्यासाठी चक्क २४ अटी घालण्यात आल्या आहेत.

नेमक्या काय अटी आहेत जाणून घेऊयात 

मैदानाचा ताबा : १९ ऑक्टोबर रोजी तयारीसाठी आणि २० ऑक्टोबर रोजी मुख्य कार्यक्रमासाठी परवानगी देण्यात आली आहे. २० तारखेला ला सकाळी ६ वाजता मैदान मिळेल, रात्री १२ वाजेपर्यंत रिकामे करावे लागेल.

मैदानाचे भाडे : प्रतिदिन ५०० रुपये सोबत १८% GST आणि २५० रुपये परवाना शुल्क पालिकेत आगाऊ भरावा लागणार आहेत. तर, २०,००० रुपये परतावायोग्य सुरक्षा अनामत रक्कम भरणे गरजेचं असणार आहे.

परवानगी रद्द : कोणत्याही कारणाने पालिकेने परवानगी रद्द केल्यास कोणताही दावा/भरपाई मागता येणार नाही.

हायकोर्ट आदेश : उच्च न्यायालयाच्या रिट याचिका 218/2010 आणि इतर आदेशानुसार मैदान हे सायलेन्स झोन आहे, त्याचे पालन करणे बंधनकारक.

ध्वनिप्रदूषण : रात्री १०.०० नंतर कोणत्याही प्रकारे लाऊडस्पीकर/ध्वनिवर्धक वापरता येणार नाही. ध्वनिप्रदूषण नियमांचे काटेकोर पालन करावे.

वाहनबंदी : शिवाजी पार्क मैदानाच्या आत कोणत्याही वाहनास प्रवेश नाही. पार्किंग करता येणार नाही.

मैदानाचे नुकसान नाही : मैदानात कोणतेही खोदकाम, खड्डा करणे, खिळे ठोकणे, नुकसान करण्यास मनाई.

स्वच्छता : कार्यक्रमानंतर कचरा, घाण, निर्माल्य स्वतः उचलून मैदान स्वच्छ करावे लागेल.कार्यक्रम संपल्यानंतर मैदान आहे त्या स्थितीत पूर्ववत करून द्यावे लागेल.

नुकसान झाल्यास कारवाई : मैदानाचे नुकसान झाल्यास अनामत रक्कम जप्त होईल आणि पुढील वर्षी परवानगी नाकारली जाईल.

मुंबई पोलिसांची परवानगी : ठाकरे गटाला फक्त महापालिकेचीच परवानगी नाही तर मुंबई पोलीस, वाहतूक पोलीस, अग्निशमन दलाची स्वतंत्र परवानगी घेणे बंधनकारक असणार आहे

बेकायदेशीर बांधकामास मनाई : कोणतेही पक्के बांधकाम, स्टेजसाठी खोदकाम करता येणार नाही.

बॅनर किंवा जाहिरात : जाहिरात किंवा बॅनर लावायचे असल्यास जाहिरात विभागाची स्वतंत्र परवानगी घ्यावी.

कायदा-सुव्यवस्था : कायदा व सुव्यवस्थेची संपूर्ण जबाबदारी आयोजकाची राहील. परिस्थिती बिघडल्यास परवानगी तात्काळ रद्द.

परवानगी केवळ मैदान वापरण्यापुरतीच : ही परवानगी केवळ मैदान वापरण्यापुरती आहे, इतर कोणत्याही परवान्याचा यात समावेश नाही.

खाद्यपदार्थ किंवा स्वयंपाक करण्यास मनाई : मैदानात स्वयंपाक करणे, चूल पेटवणे, अग्नीचा वापर करण्यास मनाई.

फूटपाथ,रस्ता अडवू नये : रस्ता, फूटपाथवर अतिक्रमण करता येणार नाही, जनतेस अडथळा होता कामा नये.

विद्युत परवानगी : विद्युत जोडणीसाठी नियमानुसार परवानगी घ्यावी, सुरक्षिततेची काळजी घ्यावी.

पावसामुळे नुकसान : नैसर्गिक कारणाने, पावसामुळे कार्यक्रम रद्द झाल्यास पालिका जबाबदार नाही.

कर्मचाऱ्यांची सुरक्षा : कार्यक्रमात काम करणाऱ्या कर्मचाऱ्यांची सुरक्षा, विमा आयोजकाची जबाबदारी.

शांतता राखणे : कोणतेही आक्षेपार्ह भाषण, गोंधळ होणार नाही याची काळजी घ्यावी.

परवानगी हस्तांतरण नाही : ही परवानगी दुसऱ्या कोणालाही हस्तांतरित करता येणार नाही.

अंतिम अधिकार : या सर्व अटींचा भंग झाल्यास सहाय्यक आयुक्त यांना परवानगी रद्द करण्याचा अंतिम अधिकार राहील.

महानगरपालिकेनं या २४ अटी ठाकरे गटाला घातल्या असून यंदाचा दसरा मेळावा ठाकरे गटासाठी नक्कीच अटी-शर्तीसोबतच आव्हानात्मक ठरणार आहे.