ओला आणि उबरसारखी आता ॲम्ब्युलन्सही अवघ्या काही सेकंदांत मोबाईलवरून बुक होणार. वैद्यकीय आणीबाणीत रुग्णांचे प्राण वाचवण्यासाठी महाराष्ट्र सरकार आणतंय एक मोठं डिजिटल ॲप असणार आहे. अचानक उद्भवलेली वैद्यकीय आणीबाणी किंवा रस्त्यावरील भीषण अपघात असो रुग्णाला वेळेत रुग्णालयात पोहोचवण्यासाठी ॲम्ब्युलन्स मिळवणे हे नातेवाईकांसाठी मोठे आव्हान ठरते. ओला-उबरसारख्या कॅब ज्याप्रमाणे आपण काही सेकंदात बुक करतो, अगदी त्याच धर्तीवर आता महाराष्ट्रात रुग्णवाहिका बुक करण्याची सुविधा उपलब्ध होणार आहे. राज्य सरकारचा परिवहन विभाग लवकरच रुग्णवाहिका सेवेसाठी एक विशेष डिजिटल प्लॅटफॉर्म आणि मोबाईल ॲप लाँच करण्याच्या तयारीत आहे.

या डिजिटल प्लॅटफॉर्मच्या माध्यमातून नागरिकांना मोबाईल ॲप किंवा वेबसाइटवरून त्यांच्या परिसरातील सर्वात जवळची आणि उपलब्ध रुग्णवाहिका शोधता येईल. या निर्णयामुळे ऐनवेळी रुग्णांचे प्राण वाचवण्यासाठी मोठी मदत होणार आहे.

ॲपवर काय-काय असणार खास?

लाईव्ह लोकेशन : रुग्णवाहिका सध्या कुठे आहे आणि ती किती वेळात पोहोचेल याची अचूक माहिती स्क्रीनवर दिसेल.

सेवा शुल्क : ॲम्ब्युलन्स बुक करण्यापूर्वीच तिचे सेवा शुल्क किती असेल, हे आधीच स्पष्ट दिसेल.

पारदर्शकता : रुग्णाच्या नातेवाईकांना बुकिंग करण्यापूर्वी सर्व आवश्यक माहिती एकाच ठिकाणी उपलब्ध होईल.

RTO कडे नोंदणीकृत सर्व ॲम्ब्युलन्स जोडल्या जाणार

राज्यातील विविध प्रादेशिक परिवहन कार्यालयांमध्ये नोंदणीकृत असलेल्या रुग्णवाहिकांची संपूर्ण माहिती या डिजिटल प्रणालीशी जोडली जाणार आहे. यासाठी परिवहन विभाग आरोग्य विभागाच्या समन्वयाने काम करत आहे. यामध्ये सरकारी आणि खासगी रुग्णालयांच्या रुग्णवाहिकांसह खासगी ॲम्ब्युलन्स चालकांनाही सहभागी करून घेण्याचा विचार आहे. तसेच खासगी रुग्णवाहिका चालकांसाठी या प्लॅटफॉर्मवर नोंदणी करणे अनिवार्य केले जाण्याची शक्यता आहे. या प्रणालीत नोंदणीकृत होणाऱ्या प्रत्येक रुग्णवाहिकेत काही किमान वैद्यकीय सोयी-सुविधा असणे बंधनकारक केले जाऊ शकते.

‘गोल्डन अवर’मध्ये वाचणार रुग्णांचे प्राण

रस्ते अपघातांच्या घटनेनंतरचा पहिला तास म्हणजेच ‘गोल्डन अवर’ अत्यंत संवेदनशील मानला जातो. या वेळेत गंभीर जखमी रुग्णाला योग्य वैद्यकीय उपचार मिळाल्यास त्याचे प्राण वाचू शकतात. म्हणूनच आपत्कालीन परिस्थितीत प्रतिसाद देण्याचा वेळ कमी करून तातडीने रुग्णवाहिका उपलब्ध करून देणे, हा या योजनेचा मुख्य उद्देश आहे.

फोन कॉलच्या त्रासातून होणार सुटका

सध्या नागरिकांना ॲम्ब्युलन्स मिळवण्यासाठी आपत्कालीन हेल्पलाइन किंवा स्थानिक खासगी चालकांशी संपर्क साधावा लागतो. यासाठी एकापाठोपाठ एक अनेक फोन कॉल्स करावे लागतात. प्रस्तावित प्लॅटफॉर्ममुळे ही संपूर्ण प्रक्रिया एकाच डिजिटल इंटरफेसवर सोपी होईल.

याशिवाय, प्रवासादरम्यान प्राथमिक वैद्यकीय मदत देऊ शकतील अशा रुग्णवाहिकांचा यात समावेश केला जाईल. काही विशेष सेवांमध्ये डॉक्टर किंवा नर्स उपलब्ध करून देण्याबाबतही विचार सुरू आहे. सध्या हा प्रस्ताव नियोजनाच्या टप्प्यावर असून, सविस्तर नियमावली तयार झाल्यानंतरच या प्रणालीच्या अंमलबजावणीबाबत अंतिम निर्णय घेतला जाईल.