जळगाव जिल्ह्यातील चोपडा शहरातील स्वस्तिक टॉकीज परिसरात आज दुपारी भीषण अपघाताची घटना घडली. महामंडळाच्या एसटी बसचा ब्रेक फेल झाल्याने बसने दोन दुचाकींना जोरदार धडक दिली. या दुर्घटनेत दोन जणांचा जागीच मृत्यू झाला असून दोन जण गंभीर जखमी झाले आहेत.

मृतांमध्ये रवींद्र बहारे (वय ४०) आणि सोनू रशीद पठाण (वय २२) यांचा समावेश आहे. तर अनिता बहारे आणि शाकीर शेख हे गंभीर जखमी असून त्यांच्यावर चोपडा उपजिल्हा रुग्णालय तसेच खासगी रुग्णालयात उपचार सुरू आहेत.

प्राथमिक माहितीनुसार, एसटी बसचा ब्रेक अचानक फेल झाल्याने चालकाचे नियंत्रण सुटले आणि बसने दोन दुचाकींना चिरडले. अपघात इतका भीषण होता की बसने पुढे जाऊन एका रिक्षालाही धडक दिली.

घटनेनंतर परिसरातील नागरिकांनी तातडीने घटनास्थळी धाव घेतली आणि पोलिसांना माहिती दिली. पोलिसांनी तत्काळ घटनास्थळी धाव घेत कारवाई सुरू केली. अपघातानंतर परिसरात काही काळ तणावाचे वातावरण निर्माण झाले होते.

या घटनेची माहिती मिळताच आमदार चंद्रकांत सोनवणे यांनीही घटनास्थळी भेट देत परिस्थितीची पाहणी केली. या अपघातामुळे परिसरात हळहळ व्यक्त केली जात आहे. अधिक तपास पोलीस करत आहेत.