12 ऑगस्टला मुंबई-पुणे एक्स्प्रेसवेवरील कनेक्टिंग लिंक तीन तास बंद राहणार आहे. पुणे-मुंबई वाहतूक जुन्या घाट मार्गाने वळवण्यात येणार असून वाहनचालकांसाठी महत्त्वाच्या सूचना जाणून घ्या. महाराष्ट्र राज्य रस्ते विकास महामंडळाकडून या मार्गिकेच्या देखभाल दुरुस्तीच्या कामासह येथे माॅकड्रिल घेण्यात येणार आहे. या कामासाठी ही मार्गिका बुधवारी दुपारी तीन तास बंद राहणार असून या दरम्यान वाहतूक मुंबई-पुणे द्रुतगती महामार्गावरील घाट परिसरातून वळविण्यात येणार आहे.

मिसिंग लिंकवरील वाहतूक बंद 

मुंबई-पुणे प्रवास करणाऱ्या वाहनचालकांसाठी महत्त्वाची बातमी आहे. बुधवारी १२ ऑगस्ट २०२६ जर तुम्ही प्रवास करणार असाल तर आधी ही बातमी पाहा. उद्या बुधवारी १२ ऑगस्ट २०२६ रोजी मुंबई पुणे द्रुतगती महामार्गावरील कनेक्टींग लिंकवरील म्हणजे मिसिंग लिंकवरील वाहतूक ३ तास बंद असणार आहे .पुण्याहून मुंबईच्या दिशेने जाणारी मार्गिका बुधवारी तीन तासांसाठी पूर्णपणे बंद असणार आहे. देखभाल-दुरुस्ती आणि मॉक ड्रिलच्या पार्श्वभूमीवर पुण्याहून मुंबईच्या दिशेने जाणारी मिसिंग लिंकची मार्गिका तात्पुरती बंद ठेवण्यात येणार आहे.

या कालावधीत पुण्यावरून मुंबईकडे येणाऱ्या वाहनांना जुन्या मुंबई -पुणे द्रुतगती मार्गाच्या घाट विभागाकडून वळवण्यात येणार आहे. अधिकाऱ्यांनी वाहनचालकांना आवाहन केले आहे की, त्यांनी नियोजित रस्ताबंदीच्या काळात पर्यायी मार्गाचा वापर करावा आणि वाहतुकीच्या व्यवस्थेशी सहकार्य करावे.

वाहनांना जुन्या मुंबई-पुणे एक्स्प्रेसवेवरून वळवणार

12 ऑगस्ट रोजी दुपारी 12 ते 3 वाजेपर्यंत मिसिंग लिंकवरील पुणे-मुंबई मार्गिका वाहतुकीसाठी बंद राहणार आहे. या कालावधीत देखभाल-दुरुस्तीची कामे तसेच मॉक ड्रिल घेण्यात येणार आहे. त्यामुळे या मार्गावरून मुंबईच्या दिशेने जाणाऱ्या वाहनचालकांनी पर्यायी मार्गाचा वापर करणे आवश्यक आहे. मात्र मिसिंग लिंकवरील मुंबईहून पुण्याकडे जाणारी मार्गिका वाहतुकीसाठी सुरू राहणार आहे. त्यामुळे केवळ पुण्याकडून मुंबईच्या दिशेने जाणाऱ्या वाहनांवर या वाहतूक बदलाचा परिणाम होणार आहे.

अडचण आल्यास कुठे संपर्क कराल?

दरम्यान या कालावधीत वाहनचालकांना काही अडचण निर्माण झाल्यास मदतीसाठी मुंबई-पुणे द्रुतगती मार्गाच्या नियंत्रण कक्षाशी किंवा महामार्ग पोलीस विभागाशी संपर्क साधू शकता. त्यासाठी संपर्क क्रमांकही देण्यात आले आहेत.
मुंबई-पुणे द्रुतगती मार्ग नियंत्रण कक्ष : 9822498224
महामार्ग पोलीस विभाग : 9833498334

या दोन संपर्क क्रमांकावर तुम्ही मदत मागू शकता.

वाहनचालकांनी लक्षात ठेवण्यासारख्या महत्त्वाच्या गोष्टी

12 ऑगस्ट रोजी दुपारी 12 ते 3 वाजेपर्यंत पुणे-मुंबई कनेक्टिंग लिंक बंद राहणार.
पुण्याकडून मुंबईकडे जाणारी वाहतूक जुन्या मुंबई-पुणे द्रुतगती मार्गावरील घाट मार्गाने वळवली जाणार.
मुंबईकडून पुण्याकडे जाणारी कनेक्टिंग लिंकची मार्गिका सुरू राहणार.
वाहनचालकांनी पर्यायी मार्गाचा वापर करून प्रशासनाला सहकार्य करावे.
आपत्कालीन मदतीसाठी दिलेल्या नियंत्रण कक्ष आणि महामार्ग पोलीस क्रमांकावर संपर्क साधता येईल.