अमोल भालेराव
प्रसिद्ध मराठी अभिनेते किरण माने हे त्यांच्या अभिनय कौशल्यासोबतच सोशल मीडियावर स्पष्ट राजकीय आणि सामाजिक भूमिका मांडण्यासाठी ओळखले जातात. अलीकडेच त्यांनी फेसबुकवर पोस्टच्या माध्यमातून सत्ताधारी पक्षांच्या आयटी सेल (IT Cell), आणि सध्याच्या राजकीय नरेटिव्हवर जोरदार निशाणा साधला आहे. त्यांच्या या पोस्ट्स सोशल मीडियावर चांगल्याच चर्चेत आल्या आहेत.
पोस्टच्या माध्यमातून आयटी सेलवर जोरदार हल्लाबोल
किरण माने यांनी आपल्या फेसबुक पोस्टच्या माध्यमातून पुन्हा एकदा सत्ताधारी आणि त्यांच्या समर्थकांसह आयटी सेलवर जोरदार हल्लाबोल केला आहे. पंतप्रधान नरेंद्र मोदी यांच्या नुकत्याच झालेल्या उझबेकिस्तान दौऱ्याचा आणि तिथून मिळालेल्या सर्वोच्च पुरस्काराचा संधर्भ जोडत, किरण माने यांनी आयटी सेलच्या कार्यपद्धतीवर आणि नरेटिव्हवर अत्यंत उपरोधिक शैलीत आक्षेप घेतला आहे.
फायद्यासाठी सच्चा हिंदू उझबेकिस्तानला जाऊन…
आयटी सेलच्या कामाच्या पद्धतीवर भाष्य करताना माने म्हणाले की,”हे नाय पटत आपल्याला. निषेध. दोस्त कितीही मोठा असला तरी त्याच्या फायद्यासाठी सच्चा हिंदू उझबेकिस्तान ला जाऊन, बाबराचे पाय चाटेल का? आपल्या देशातलं अब्जावधी रुपयांचं भांडवल बाबराच्या देशात टाकून, त्यांना मालामाल करून, कवडीमोलाचा हार कुणी गळ्यात घालून घेईल का? नाय नाय…
आय टी सेल वालो…कह दो के ये झूठ है” असं म्हणत त्यांनी अशी बोचरी टीका करत किरण माने यांनी आयटी सेलच्या भूमिकेवर प्रश्न उपस्थित केले आहेत.
उझबेकिस्तान दौरा आणि ‘बाबर’ या विषयाचा संदर्भ
पंतप्रधान नरेंद्र मोदी यांच्या उझबेकिस्तान दौऱ्यादरम्यान तेथील सर्वोच्च नागरी सन्मान प्राप्त झाल्याच्या पार्श्वभूमीवर हा राजकीय वाद पेटला आहे. मुघल सम्राट बाबरचे मूळ जन्मस्थान फरगाना खोरं हे सध्याच्या उझबेकिस्तानमध्ये असल्याने विरोधकांनी सत्ताधारी भाजप आणि संघावर निशाणा साधला होता. माने यांनी याच राजकीय मुद्द्याचा संदर्भ घेत आयटी सेलच्या दुटप्पीपणावर थेट ताशेरे ओढले आहेत.
आयटी सेलच्या जुन्या नरेटिव्हवर हल्लाबोल
माने यांनी आपल्या इतर पोस्ट्समधूनही आरोप केला आहे की आयटी सेलकडून खोट्या सर्वेक्षणांच्या बातम्या पसरवून आणि गोदी मीडियाचा वापर करून नरेटिव्ह सेट करण्याचा प्रयत्न केला जातो. हिंदू-मुस्लिम वाद, शरिया किंवा राहुल गांधींवरील ट्रॉलिंग यांसारखे जुने आणि आऊटडेटेड मुद्दे आता चालत नसून नवीन पिढी म्हणजे GenZ आणि सामान्य देश अशा प्रोपोगंडाला नाकारत आहे, असा दावा त्यांनी केला.
माने यांच्या पोस्टमुळे सोशल मीडियावर वाद
किरण माने यांच्या या सडेतोड आणि बोचऱ्या टीकेनंतर सोशल मीडियावर दोन गट आमनेसामने आले आहेत. त्यांच्या समर्थकांनी त्यांच्या या धाडसी भूमिकेचे कौतुक केले आहे, तर सत्ताधारी पक्षाच्या समर्थकांनी आणि आयटी सेलच्या युझर्सनी किरण माने यांच्यावर जोरदार पलटवार करत त्यांच्यावर टीका केली आहे.
