अमोल भालेराव
पुण्यातील एम.पी.एस.सी. आंदोलनकर्त्या विद्यार्थ्यांची महाराष्ट्र नवनिर्माण सेनेचे अध्यक्ष राज ठाकरे यांनी भेट घेऊन त्यांच्याशी संवाद साधला व त्यांच्या मागण्या जाणून घेतल्या. दरम्यान यावेळी विद्यार्थ्यांना आंदोलन मागे घेण्याचा सल्ला राज ठाकरेंनी दिला आहे.राज ठाकरेंचा हा सल्ला ऐकून सर्वांनाच धक्का बसला.
“उपोषण हा मार्ग नाही”, राज ठाकरेंचा सल्ला
आंदोलक विद्यार्थ्यांची प्रमुख मागणी MPSC च्या अध्यक्षांना पदावरून हटवण्याची आहे.यावेळी उपोषणाला बसलेल्या विद्यार्थ्यांशी संवाद साधताना राज ठाकरे यांनी स्पष्ट केले की, १९५० च्या नियमांनुसार MPSC अध्यक्षांना हटवणे थेट राज्य सरकारच्या हातात नसतं. यासाठी राज्यपाल आणि सर्वोच्च न्यायालयाकडे जावं लागतं. राज ठाकरे म्हणाले की, “उपोषण हा मार्ग नाही; आपण प्रश्नाच्या मुळाशी जाऊन त्यावर मार्ग काढण्यासाठी काम करूया,” अशी भूमिका राज ठाकरेंनी मांडली.
“आपला फोकस हलू देऊ नका”
तसंच ते राज ठाकरेंनी विद्यार्थ्यांना विश्वासही दिला की ते केवळ भाषणबाजी करण्यासाठी आलेले नाहीत, तर विद्यार्थ्यांच्या संतापात सहभागी होण्यासाठी आले आहेत.ते पुढे म्हणाले की, “महाराष्ट्रातील तरुण मुला-मुलींना त्यांच्या हक्काचा रोजगार आणि न्याय मिळवून देण्यासाठी मी कोणाचेही पाय धरण्यास तयार आहे.आपला फोकस आणि लढा कायम ठेवा. हा राग क्षणिक असू देऊ नका , जोपर्यंत मागण्या पूर्ण होत नाहीत तोपर्यंत आपला फोकस आणि लढा कायम ठेवा”
View this post on Instagram
राज ठाकरेंचे विद्यार्थ्यांना शिवतीर्थावर आमंञण
एवढंच नाही तर या प्रश्नावर पुढील चर्चा आणि मार्ग काढण्यासाठी संबंधित विद्यार्थ्यांना राज ठाकरेंनी शिवतीर्थ या आपल्या निवासस्थानी चर्चेसाठी आमंत्रितही केलं आहे.राज ठाकरे यांनी ९ किंवा १० ऑक्टोबर रोजी विद्यार्थी प्रतिनिधींना मुंबईत पुढील चर्चेसाठी बोलावले आहे.
राज ठाकरेंच्या भेटीमुळे आणि आश्वासनामुळे विद्यार्थ्यांमध्ये नवा उत्साह
दरम्यान मनसे अध्यक्ष राज ठाकरे यांनी पुण्यात प्रलंबित मागण्यांसाठी आंदोलनाला बसलेल्या MPSC विद्यार्थ्यांच्या मागण्यांना जाहीर पाठिंबा दर्शवला आहे. पण उपोषण करून हा प्रश्न सुटणार नसल्याचंही ते म्हणाले. राज ठाकरे यांनी विद्यार्थ्यांना आश्वस्त केले आहे की, ते स्वतः या विषयाचा संपूर्ण अभ्यास करून योग्य कायदेशीर मार्ग शोधण्यासाठी विद्यार्थ्यांच्या पाठीशी उभे राहतील. राज ठाकरे यांच्या या भेटीमुळे आणि आश्वासनामुळे आंदोलनस्थळी विद्यार्थ्यांमध्ये नवा उत्साह पाहायला मिळाला.
