मुंबईच्या महापौरांना पुन्हा एकदा बॉम्बस्फोटाच्या धमकीचा ई-मेल आला आहे. मुंबईच्या महापौर रितू तावडे यांच्या अधिकृत ई-मेल अकाऊंटवर त्यांचे कार्यालय बॉम्बने उडवून देण्याची धमकी आली आहे. महापौरांच्या कार्यालयासोबतच मुंबई मेट्रो, शाळा, शेअर बाजार देखील उडवून देण्याची धमकी मिळाली आहे. १५ ऑगस्टपूर्वी हा सोफ्ट घडवून आणला जाईल असा दावा या ई-मेलमध्ये करण्यात आला आहे.

महापौरांना दोन वेळा धमकीचे ई-मेल

या मेलमध्ये खलिस्तान समर्थक घोषणा आणि काही व्यक्तींची नावे नमूद करण्यात आली आहेत त्यामुळे या मेलचं गांभीर्य अधिक आहे. यापूर्वीही महापौरांना दोन वेळा धमकीचे ई-मेल आले होते. धमकीचा मेल मिळाल्यानंतर मुंबई पोलिसांकडून तपास सुरू झाला आहे. ई-मेलचा आयपी, स्रोत आणि प्रेषकाचा शोध सायबर पोलिसांकडून घेतला जाईल. या ईमेलमध्ये मुलांना शाळेत पाठवू नका, मेट्रोने प्रवास करू देऊ नका असा इशारा देखील देण्यात आला आहे.

2 कोटी 89 लाखाचं टेंडर काढण्यात आल्यामुळे रितू तावडे यांच्यावर आरोप

रितू तावडे यांचं नाव अलीकडे महापौर बंगल्याच्या वादामुळे चर्चेत होतं. महापौर बंगल्याच्या कामासाठी 2 कोटी 89 लाखाचं टेंडर काढण्यात आल्यामुळे रितू तावडे यांच्यावर आरोप झाले. त्यांच्यावर टीका सुरु होती. या सर्व वादामुळे अखेर रितू तावडे यांनी मुंबई महापालिकेचं ते वादग्रस्त टेंडर मागे घेण्याचे आदेश दिले.”हे काम राणीच्या बागेचं होतं. पण महापौर बंगल्याचा चुकून यामध्ये उल्लेख झाला. या सगळ्यामुळे हे टेंडर मागे घेण्याचे आदेश मी दिलेले आहेत” अस स्पष्टीकरण महापौर रितू तावडे यांनी दिलं आहे.

या प्रकरणाचा सायबर पोलिसांकडून तपास सुरू

यापूर्वी मुंबईच्या महापौरांना दोनवेळा धमकीचा ई-मेल आला होता. या धमकीच्या मेलनंतर मुंबई पोलीस सतर्क झाली असून त्यांना या प्रकरणाचा तपास सुरू केला आहे. ई-मेल कोणत्या आयपी अॅड्रेसवरून पाठवण्यात आला आहे. याचा सोर्स काय आणि हा कोणी पाठवला आहे याचा शोध सायबर पोलिसांकडून घेतला जात आहे.