रत्नागिरी शहरातील जैन नगर परिसरात असलेल्या महालक्ष्मी मिनी मॉलला आज सकाळी अचानक भीषण आग लागल्याची दुर्घटना घडली आहे. या आगीने अत्यंत रौद्र रूप धारण केले असून, दुकानातील सर्व साहित्य जळून खाक झाले आहे.घटनेची माहिती मिळताच अग्निशमन दलाच्या गाड्या घटनास्थळी दाखल झाल्या असून, आग विझवण्याचे शर्थीचे प्रयत्न युद्धपातळीवर सुरू आहेत. मात्र, अडीच तासांहून अधिक काळ लोटूनही आग अद्याप आटोक्यात आलेली नाही, अशी माहिती अग्निशमन विभागाकडून देण्यात आली आहे.

महालक्ष्मी मिनी मॉलमध्ये अचानक आगीचा भडका

मिळालेल्या माहितीनुसार, जैन नगर येथील महालक्ष्मी मिनी मॉलमध्ये अचानक आगीचा भडका उडाला. दुकानात मोठ्या प्रमाणावर ज्वलनशील आणि इतर साहित्य असल्याने आगीने काही क्षणांतच संपूर्ण दुकानाला आपल्या विळख्यात घेतले. आगीचे आणि धुराचे मोठे लोळ परिसरातून दिसत असल्याने नागरिकांमध्ये एकच घबराट उडाली. स्थानिक नागरिकांनी तत्काळ याची माहिती अग्निशमन दलाला दिली.

Ratnagiri, Maharashtra: A fire breaks out at Mahalakshmi Mini Mall in Jain Nagar. Fire brigade personnel are working to bring the blaze under control.

(Source: Fire Department) https://t.co/aK7QHqjOqW

— IANS (@ians_india) November 11, 2026

अडीच तास उलटूनही आग आटोक्यात नाही

घटनेची माहिती मिळताच अग्निशमन दलाचे जवान पाण्याचे बंब घेऊन तातडीने घटनास्थळी पोहोचले आणि त्यांनी आग विझवण्याच्या कार्याला सुरुवात केली. दुकानातील साहित्यामुळे आग सतत भडकत असल्याने ती विझवण्यात अग्निशमन दलाच्या जवानांना मोठ्या अडचणींचा सामना करावा लागत आहे. अडीच तासांहून अधिक काळ उलटून गेला तरीही आग पूर्णपणे आटोक्यात आलेली नाही. अग्निशमन दलाचे जवान पाण्याचा मारा करून आग विझवण्याचा आणि ती आजूबाजूच्या इमारतींमध्ये पसरू नये यासाठी शर्थीचे प्रयत्न करत आहेत.

लाखो रुपयांचे नुकसान, शॉर्टसर्किटची शक्यता

या भीषण आगीत महालक्ष्मी मिनी मॉलमधील सर्व माल आणि साहित्य पूर्णपणे जळून खाक झाले असून, यात लाखो रुपयांचे मोठे आर्थिक नुकसान झाल्याचा प्राथमिक अंदाज वर्तवण्यात येत आहे. आगीचे नेमके कारण अद्याप अधिकृतरीत्या स्पष्ट झालेले नसले तरी, ही आग शॉर्टसर्किटमुळे लागली असावी, अशी दाट शक्यता अग्निशमन दलाच्या अधिकाऱ्यांनी वर्तवली आहे.