मुंबई-गोवा महामार्गावरील अंजनारी पुलावर एक मोठा अपघात झाला असून,या अपघातात एक लग्जरी बस थेट उलटली आहे. यात ३० प्रवासी जखमी झाले आहेत.

मुंबई-गोवा महामार्गावरील अंजनारी पुलावर आज पहाटे एक मोठा अपघात झाला

रत्नागिरीतील मुंबई-गोवा महामार्गावरील अंजनारी पुलावर आज पहाटे एक मोठा अपघात झाला. गोव्याकडे जाणाऱ्या एका ट्रकने एका खाजगी लग्जरी बसला मागून जोरदार धडक दिली. ही धडक इतकी जोरदार होती की, बस पुलावरच पलटी झाली आहे. या अपघातात सुमारे ३० प्रवासी जखमी झाले असून, त्यापैकी आठ जणांची प्रकृती गंभीर आहे. अग्निशमन दलाच्या जवानांनी अथक प्रयत्नांनंतर बसमध्ये अडकलेल्या प्रवाशांना बाहेर काढले.

अपघातानंतर गोव्याकडे जाणारी वाहतूक पूर्णपणे थांबवण्यात आली होती. सध्या पुलावर एकेरी वाहतूक पुन्हा सुरू करण्यात आली आहे. पोलीस घटनास्थळी दाखल झाले असून, सर्व जखमींना जिल्हा सरकारी रुग्णालयात दाखल करण्यात आले आहे, जिथे त्यांच्यावर उपचार सुरू आहेत.

अपघातग्रस्त बसमधील प्रवाशांना बाहेर काढण्यासाठी तातडीने मदतकार्य सुरू करण्यात आलं आहे 

अपघाताची माहिती मिळताच हातखंबा वाहतूक पोलीस आणि लांजा पोलिसांनी घटनास्थळी धाव घेतली. अपघातग्रस्त बसमधील प्रवाशांना बाहेर काढण्यासाठी तातडीने मदतकार्य सुरू करण्यात आले. दरम्यान, बसमध्ये एक प्रवासी अडकल्याची माहिती मिळाल्यानंतर रत्नागिरी एमआयडीसी अग्निशमन दलाच्या जवानांना पाचारण करण्यात आले. अग्निशमन दलाच्या जवानांनी प्रयत्नांची पराकाष्ठा करत बसमध्ये अडकलेल्या प्रवाशाची सुखरूप सुटका केली. पोलिस आणि बचाव पथकाच्या मदतीने जखमी प्रवाशांना रुग्णालयात हलवण्यात आले. मध्यरात्रीच्या वेळी झालेल्या या अपघातामुळे बचावकार्यासाठी यंत्रणांना तातडीने हालचाली कराव्या लागल्या.

30 जखमी प्रवाशांवर विविध रुग्णालयांत उपचार

या अपघातात जखमी झालेल्या प्रवाशांना उपचारासाठी वेगवेगळ्या रुग्णालयांत दाखल करण्यात आले आहे. उपलब्ध माहितीनुसार, जखमींच्या उपचाराची व्यवस्था पुढीलप्रमाणे करण्यात आली आहे.
8 प्रवासी: रत्नागिरी जिल्हा शासकीय रुग्णालय
3 प्रवासी: लांजा ग्रामीण रुग्णालय
11प्रवासी: पाली येथील रुग्णालय

उर्वरित जखमी प्रवाशांना कुठे उपचारासाठी दाखल करण्यात आले, याबाबत अधिक तपशील उपलब्ध होणे आवश्यक आहे. जखमींच्या प्रकृतीबाबतही अधिकृत माहितीची प्रतीक्षा आहे.

मुंबई-गोवा महामार्गावरील वाहतूक विस्कळीत

अंजणारी पुलावर झालेल्या अपघातामुळे गोव्याच्या दिशेने जाणारी वाहतूक काही काळ पूर्णपणे ठप्प झाली होती. त्यामुळे महामार्गावर वाहनांच्या रांगा लागण्याची शक्यता निर्माण झाली. अपघातग्रस्त वाहनांमुळे वाहतुकीत अडथळे निर्माण झाल्यानंतर प्रशासनाने पर्यायी व्यवस्था केली. सध्या महामार्गाच्या दुसऱ्या लेनवरून एकेरी वाहतूक सुरू करण्यात आली आहे.

महामार्गावरील सुरक्षिततेचा प्रश्न पुन्हा ऐरणीवर

मुंबई-गोवा राष्ट्रीय महामार्गावर झालेल्या या भीषण अपघातामुळे रस्ते सुरक्षा आणि वाहनचालकांच्या सतर्कतेचा मुद्दा पुन्हा चर्चेत आला आहे. मध्यरात्रीच्या प्रवासादरम्यान वाहनांचा वेग, चालकांचा थकवा आणि सुरक्षित अंतर राखणे या बाबी महत्त्वाच्या ठरतात. दरम्यान, अंजणारी पुलावरील अपघाताचे नेमके कारण तपासानंतर स्पष्ट होणार आहे. जखमी प्रवाशांना लवकरात लवकर उपचार मिळावेत, यासाठी यंत्रणा कार्यरत आहेत.