अमोल भालेराव
आज दिवसभर सोशल मीडियावर पश्चिम बंगालच्या मुख्यमंत्री ममता बॅनर्जी यांच्या वकिलांच्या पोशाखातील फोटो मोठ्या प्रमाणात व्हायरल होताना पाहायला मिळाले. अनेकांनी हे फोटो शेअर केले, मात्र त्यामागचे नेमके कारण काय आहे याबाबत अनेकांना माहिती नव्हती. आता या संपूर्ण प्रकरणामागचे सत्य समोर आले आहे.
ममता बॅनर्जी गुरुवारी थेट कलकत्ता हायकोर्टात पोहोचल्या होत्या. पश्चिम बंगालमध्ये निवडणुकीनंतर झालेल्या कथित हिंसाचाराच्या प्रकरणात त्यांनी स्वतः न्यायालयात उपस्थित राहून आपली भूमिका मांडली. तृणमूल काँग्रेसने एक्स या सोशल मीडिया प्लॅटफॉर्मवर याबाबत अधिकृत माहिती देत सांगितले की, पक्षाध्यक्ष ममता बॅनर्जी या पश्चिम बंगालमध्ये भाजपकडून निवडणुकीनंतर पसरवण्यात आलेल्या कथित हिंसाचाराच्या मुद्द्यावर बाजू मांडण्यासाठी कलकत्ता हायकोर्टात दाखल झाल्या.
तृणमूल काँग्रेसने आपल्या निवेदनात म्हटले आहे की, ममता बॅनर्जी यांनी पुन्हा एकदा सिद्ध केले की त्या इतर नेत्यांपेक्षा वेगळ्या का आहेत. कठीण काळात त्या बंगालच्या जनतेला कधीही एकटे सोडत नाहीत आणि सत्य, न्याय तसेच संविधानिक मूल्यांसाठी त्यांचा संघर्ष कायम सुरू असतो.
इंग्रजी वृत्तपत्र ‘द टेलिग्राफ’च्या माहितीनुसार, ममता बॅनर्जी यांच्यासोबत तृणमूल काँग्रेसचे वरिष्ठ नेते चंद्रिमा भट्टाचार्य आणि कल्याण बॅनर्जी हे देखील उपस्थित होते.
दरम्यान, तृणमूल काँग्रेसच्या वतीने वकील एस. बंदोपाध्याय यांनी न्यायालयात याचिका दाखल केली होती. या याचिकेत निवडणुकीनंतर अनेक पक्ष नेते आणि कार्यकर्त्यांना आपली घरे सोडून पळून जाण्यास भाग पाडण्यात आल्याचा आरोप करण्यात आला आहे. तसेच केवळ तृणमूल काँग्रेसशी संबंध असल्यामुळे अनेकांवर हल्ले झाल्याचाही दावा करण्यात आला आहे.
ही याचिका 12 मे रोजी कलकत्ता हायकोर्टात दाखल करण्यात आली होती. निवडणुकीनंतर राज्यातील अनेक भागांमध्ये तृणमूल काँग्रेसच्या कार्यालयांची तोडफोड झाल्याच्या घटनाही समोर आल्या आहेत.
मात्र दुसरीकडे भाजपने हे सर्व आरोप फेटाळून लावत गंभीर प्रत्यारोप केले आहेत. भाजप नेत्यांचा दावा आहे की, या हिंसाचारात सहभागी झालेले अनेक जण हे प्रत्यक्षात निवडणूक निकालानंतर भाजप समर्थक असल्याचे भासवणारे तृणमूल कार्यकर्ते होते.
राज्य भाजप अध्यक्ष शमिक भट्टाचार्य, विरोधी पक्षनेते शुभेंदू अधिकारी आणि इतर भाजप नेत्यांनी अनेक वेळा असा आरोप केला आहे की, या हल्ल्यांमागे तृणमूल काँग्रेसचेच कार्यकर्ते असल्याचे दिसून येत आहे.
एकीकडे सोशल मीडियावर ममता बॅनर्जी यांच्या वकिलांच्या पोशाखातील फोटो चर्चेत असताना, दुसरीकडे पश्चिम बंगालमधील राजकीय वातावरण पुन्हा तापताना दिसत आहे. आता या प्रकरणात न्यायालय काय निर्णय देते याकडे संपूर्ण देशाचे लक्ष लागले आहे.
