गर्भलिंग निदान करणाऱ्यांची आता खैर नाही; आरोग्यमंत्र्यांचा विधानसभेत कडक इशारा

राज्यात काही ठिकाणी विनापरवाना IVF केंद्रे सुरू असल्याच्या तक्रारी सातत्याने समोर येत आहेत. तसेच गर्भलिंग निदानासारखा बेकायदेशीर प्रकार अजूनही काही ठिकाणी सुरू असल्याची गंभीर बाब विधानसभेत मांडण्यात आली.

यावर उत्तर देताना आरोग्यमंत्री प्रकाश आबिटकर यांनी स्पष्ट इशारा दिला की, अशा प्रकारे कायदा मोडणाऱ्या केंद्रांवर सरकार कठोर कारवाई करणार आहे. विशेष म्हणजे, गर्भलिंग निदान करणाऱ्या आणि यामागे संघटित रॅकेट चालवणाऱ्यांवर मकोका अंतर्गत कारवाई करण्याचा विचार सरकार करणार असल्याची मोठी घोषणा त्यांनी विधानसभेत केली.

गर्भलिंग निदान हा केवळ कायद्याचा भंग नसून समाजातील मुलींच्या अस्तित्वावर घाला घालणारा गंभीर गुन्हा आहे. त्यामुळे अशा प्रकारांना आळा घालण्यासाठी आरोग्य विभाग अधिक आक्रमक भूमिका घेणार असल्याचे संकेत मिळत आहेत.

विनापरवाना IVF केंद्रे, बोगस डॉक्टर, नियमांचे उल्लंघन करणारी वैद्यकीय केंद्रे आणि गर्भलिंग निदानाच्या नावाखाली सुरू असलेले रॅकेट यांच्यावर विशेष मोहीम राबवली जाण्याची शक्यता आहे.