palghar-red-alert-mumbai-heavy-rain-live-updates मुंबईत रात्रीपासून पावसाचा जोर कायम आहे. पूर्व आणि पश्चिम उपनगरांना पावसाने अक्षरशः झोडपून काढले असून, अनेक सखल भागांमध्ये पाणी साचण्यास सुरुवात झाली आहे. सततच्या पावसामुळे रस्त्यांवरील वाहतूक मंदावली असून, नागरिकांना प्रवास करताना मोठ्या अडचणींचा सामना करावा लागत आहे.

हवामान विभागाने मुंबईला पुढील चार दिवस मुसळधार पावसाचा इशारा दिला आहे. काही भागांमध्ये अतिवृष्टीची शक्यता व्यक्त करण्यात आली आहे. पुढील काही तास मुंबई आणि उपनगरांसाठी महत्त्वाचे ठरणार असून, जोरदार ते अतिजोरदार पावसाचा अंदाज वर्तवण्यात आला आहे.

पावसाचा परिणाम लोकल वाहतुकीवरही दिसू लागला आहे. काही मार्गांवर लोकल वाहतूक उशिराने सुरू असल्याची माहिती समोर येत आहे. त्यामुळे कामावर जाणाऱ्या प्रवाशांचे हाल होत आहेत.

दक्षिण मुंबईवर काळ्या ढगांचे सावट पाहायला मिळत असून समुद्रकिनारी उंच लाटा उसळताना दिसत आहेत. संपूर्ण परिसर धुक्याच्या चादरीत झाकला गेल्याचे चित्र आहे. त्यामुळे समुद्रकिनारी जाणे टाळावे, तसेच अत्यावश्यक कामाशिवाय घराबाहेर पडताना नागरिकांनी विशेष खबरदारी घ्यावी, असे आवाहन प्रशासनाकडून करण्यात येत आहे.