अमोल भालेराव
भारतात दररोज लाखो लोक रेल्वेने प्रवास करतात. पण भारतीय रेल्वेमध्ये एकामागून एक नवीन आयाम जोडले जात आहेत. भारताच्या प्रसिद्ध वंदे भारत ट्रेनने लोकांच्या प्रवासाची पद्धत मोठ्या प्रमाणात बदलली आहे.आता देशभरात १०० हून अधिक वंदेभारत एक्सप्रेस धावत आहेत. या वंदेभारत भारत सेमी हायस्पीड ट्रेन असल्याने प्रवाशांना आरामदायी प्रवासासोबतच आता वेगवान प्रवासाची अनुभूती मिळत आहे. मात्र आता यामध्ये आता अजून एका वंदेभारतची एन्ट्री होणार आहे. लांबच्या आणि रात्रीच्या प्रवासासाठी वंदेभारत स्लिपर ट्रेनचे आगमन झाले आहे.
फाईव्ह स्टार हॉटेलसारखी वंदेभारत
वंदेभारत स्लिपर ट्रेन ही अत्यंत आरामदायी आणि खास रात्रीचा प्रवास करण्यासाठी तयार करण्यात आली आहे. या ट्रेनच्या आत तुम्ही आरामात झोपून प्रवास करु शकता. देशातील पहिली वंदे भारत स्लिपर ट्रेन हावडा ते कामाख्या (गुवाहाटी) या मार्गावर धावत आहे. पंतप्रधान नरेंद्र मोदी यांच्या हस्ते १७ जानेवारी २०२६ रोजी या पहिल्या वंदेभारत स्लिपर ट्रेनचे उद्घाटन केले असून, हा मार्ग पश्चिम बंगाल आणि आसामला जोडतो.आता दुसरी वंदेभारत स्लिपर ट्रेन पुणे ते बंगळुरु मार्गावर धावणार असून १२ तासात पुणे ते बंगळुरु अंतर कापता येणार आहे. या वंदेभारत स्लिपर ट्रेनचा एक व्हिडीओ परदेशी तरुणीने व्हायरल केला आहे.ही वंदेभारत चक्क ‘फाईव्ह स्टार हॉटेल’ सारखी भासते.
View this post on Instagram
आतून कशी आहे ट्रेन?
या तरुणीने व्हिडीओमध्ये ट्रेनच्या आलिशान आतील भागाचे वर्णन केलं आहे. केबिन दाखवल्या आहेत, प्रभावी प्रकाशयोजना आणि स्लीपर बर्थवर प्रकाश टाकला आहे. या ट्रेनचे अत्याधुनिक इंटेरिअर, आरामदायी बर्थ, प्रायव्हसी स्मार्ट डोअर लॉक, टच फ्री सेंसर असणारे स्वच्छ बायो व्हॅक्युम टॉयलेट आणि प्रत्येक सीटजवळ एअर वेंट तसेच रिडींग लाईट्सची स्तुती केली आहे.या तरुणीने या ट्रेनची तुलना थेट ‘फाईव्ह स्टार हॉटेल’ सोबत केली आहे.
या वंदे भारतचे आणखी वैशिष्ट्य काय आहे?
वंदे भारत ट्रेनच्या वैशिष्ट्यांबद्दल बोलायचे झाल्यास, तिचा आवाज विमानापेक्षा १०० पट कमी आहे. विमानाने प्रवास करणाऱ्या लोकांना एकदा या ट्रेनचा अनुभव घेतल्यावर पुन्हा प्रवास करण्याची इच्छा होते. वंदे भारत ट्रेन लोकोमोटिव्हशिवाय, ‘डिस्ट्रिब्युटेड ट्रॅक्शन पॉवर टेक्नॉलॉजी’ नावाच्या तंत्रज्ञानाचा वापर करून चालते. तिच्या डब्यांमध्ये प्रवाशांसाठी ऑन-बोर्ड वायफाय, जीपीएस-आधारित प्रवासी माहिती प्रणाली, सीसीटीव्ही, सर्व डब्यांमध्ये स्वयंचलित दरवाजे, फिरणाऱ्या खुर्च्या आणि बायो-व्हॅक्यूम शौचालये यांसारख्या सुविधांचा समावेश आहे. तिचा कमाल वेग ताशी १६० किलोमीटर आहे. एकंदरीत ही नवी वंदे भारत प्रवाशांच्या प्रवासाची उत्सुकता नक्कीच वाढवणारी असणार आहे.
