राज्य सरकारकडून अमराठी रिक्षा आणि टॅक्सी चालकांना मराठी भाषा अनिवार्य करण्यात आली आहे. प्रवाशांसोबत जुजबी मराठी तरी बोलता यावी, अशी सरकारची भूमिका आहे. महाराष्ट्राची राज्यभाषा मराठी आहे. त्यामुळे महाराष्ट्रात व्यवसाय करायचा असेल तर इथल्या मातीतली मराठी भाषा रिक्षा आणि टॅक्सी चालकांना यावी, अशी सरकारची भूमिका आहे. राज्य सरकारकडून याआधी रिक्षा आणि टॅक्सी चालकांना मराठी शिकण्यासाठी मुदतवाढ देण्यात आली होती. 15 ऑगस्टपर्यंत मराठी शिकण्यासाठी मुदत देण्यात आली होती. त्यानंतरही मराठी शिकता आली नाही तर रिक्षा आणि टॅक्सी चालकांचे थेट परवाना आणि बॅच निलंबित केले जातील, असा इशारा देण्यात आला होता. पण आता ही सर्व कारवाई पुढचे एक वर्ष तरी होणार नाही, असं मुख्यमंत्री देवेंद्र फडणवीस यांनी स्पष्ट केलं आहे.

अमराठी ऑटो आणि टॅक्सी चालकांना मोठा दिलासा

अमराठी ऑटो आणि टॅक्सी चालकांना मोठा दिलासा मिळाला आहे. मुख्यमंत्री देवेंद्र फडणवीस यांनी अमराठी ऑटो-टॅक्सी चालकांना मराठी शिकण्यासाठी एक वर्षाचा अतिरिक्त कालावधी दिला आहे. या कालावधीत त्यांच्यावर कोणतीही कारवाई होणार नाही किंवा त्यांचा परवाना रद्द केला जाणार नाही. देवेंद्र फडणवीस यांनी याबबातची घोषणा केली आहे. त्यांनी पत्रकारांशी संवाद साधताना हे स्पष्ट केलं की, राज्यातील गैर-मराठी रिक्षा आणि टॅक्सी चालकांना मराठी भाषा शिकण्यासाठी एक वर्षाची मुदत देण्यात आली आहे. रिक्षा आणि टॅक्सी चालकांच्या एका शिष्टमंडळाने त्यांची भेट घेऊन ही विनंती केल्यानंतर ही मुदत वाढवण्यात आल्याचं त्यांनी म्हटलं.

टॅक्सी आणि रिक्षा चालकांना एक वर्षाची मुदतवाढ

देवेंद्र फडणवीस म्हणाले की, “मी आज हा निर्णय घेतला आहे की, या टॅक्सी आणि रिक्षा चालकांना एक वर्षाची मुदतवाढ दिली जाईल. कोणतीही कारवाई दरम्यानच्या काळात केली जाणार नाही. या एक वर्षात वेगवेगळ्या प्रकारे क्लासेस तयार करुन, जुजबी मराठी सर्व ऑटो आणि टॅक्सी चालकांना ते शिकवतील. ते स्वत:हून समोर आलेले आहेत. त्यामुळे त्यांना वेळ देणं गरजेचं होतं. म्हणून राज्य सरकारने हा निर्णय घेतला आहे”, असं फडणवीसांनी स्पष्ट केलं.

ऑटो आणि रिक्षा चालकांनी घेतली फडणवीसांची भेट 

हाजी अराफत यांच्या नेतृत्वाखालील ऑटो आणि रिक्षा चालकांनी गुरुवारी फडणवीसांची भेट घेतली. या शिष्टमंडळाने मराठी भाषेच्या गरजेला पाठिंबा दर्शवला. मराठी शिकण्याचे प्रयत्न सुरू आहेत. भविष्यातही हे प्रयत्न सुरूच राहतील मात्र, विविध वयोगटांतील रिक्षा आणि टॅक्सी चालक अल्पावधीत मराठी शिकू शकणार नाहीत. त्यांच्या या विनंतीनंतर या अमराठी रिक्षा आणि ऑटो चालकांना मराठी शिकण्यासाठी एक वर्षाचा कालावधी देण्याचा निर्णय घेण्यात आल्याचं फडणवीसांनी म्हटलं.

इतक्या कमी वेळात शिकणे कठीण

महाराष्ट्रात सर्व चालकांना जुजबी मराठी बोलता आले पाहिजे याबाबत त्यांचे समर्थनच आहे. ते शिकण्याचा प्रयत्नही करत आहेत. पण चालक विविध वयोगटातील असल्याने त्यांना इतक्या कमी वेळात मराठी शिकणे शक्य नसल्याची अडचण सांगत त्यांनी मुदतवाढ मागितली. ही मागणी मान्य करत त्यांना एक वर्षाची मुदतवाढ दिली असून या वर्षभरात ते क्लासेस तसेच इतर माध्यमातून मराठी शिकतील. या दरम्यान त्यांच्यावर कोणतीही कारवाई होणार नसल्याचे फडणवीस यांनी स्पष्ट केले.