१० दिवसांच्या मनोभावे पूजेनंतर आज अनंत चतुर्दशीच्या दिवशी लाडक्या गणरायाला निरोप देण्याचा भावुक क्षण आला आहे. ‘गणपती बाप्पा मोरया, पुढच्या वर्षी लवकर या’च्या जयघोषात, ढोल-ताशांच्या गजरात आणि गुलालाच्या उधळणीत मुंबईतील गणेश विसर्जन मिरवणिकांना दणक्यात सुरुवात झाली आहे. बोरीवलीतून प्रसिद्ध ‘उपनगरचा राजा’ विसर्जनासाठी मार्गस्थ झाला असून, लालबागचा राजा आणि मुंबईचा राजा यांसारख्या मानाच्या गणपतींच्या निरोपाची आरती करून मिरवणुका हळूहळू गिरगाव चौपाटीच्या दिशेने पुढे सरकत आहेत. मुंबईसह राज्यभरात एकाच वेळी भक्तीचा उत्साह आणि निरोपाचे भावनिक वातावरण पाहायला मिळत आहे.

पोलीस आणि प्रशासनाचा कडेकोट बंदोबस्त

लाखोंच्या संख्येने रस्त्यावर उतरणाऱ्या भाविकांची सुरक्षा आणि कायदा-सुव्यवस्था राखण्यासाठी पोलीस आणि महापालिका प्रशासनाने कडेकोट व्यवस्था केली आहे. मुंबईत हजारो पोलिसांचा फौजफाटा, एसआरपीएफ आणि गृहरक्षक दल तैनात करण्यात आले आहे.

CCTV आणि डिजिटल नियंत्रण: गिरगाव चौपाटीसह प्रमुख विसर्जन स्थळांवर CCTV कॅमेऱ्यांच्या माध्यमातून थेट निगराणी ठेवली जात आहे. डिजिटल मोबाईल रेडिओ आणि हॅम रेडिओद्वारे आपत्कालीन यंत्रणांमध्ये समन्वय साधला जात आहे.

आपत्ती व्यवस्थापन: २५,००० हून अधिक पालिका कर्मचारी, ३४ क्रेन, ८५ रुग्णवाहिका, १० मोटरबोट, अग्निशमन दल आणि कोस्ट गार्डची पथके चौपाट्यांवर सज्ज ठेवण्यात आली आहेत.

मुंबईकरांच्या सोयीसाठी मेट्रो-३ (अ‍ॅक्वा लाईन) रात्रभर धावणार

विसर्जन सोहळा पाहायला आणि बाप्पाला निरोप देण्यासाठी रात्री उशिरापर्यंत रस्त्यावर असणाऱ्या गणेशभक्तांच्या परतीच्या प्रवासासाठी मुंबई मेट्रो प्रशासनाने मोठा दिलासा दिला आहे. मुंबई मेट्रो लाईन-३ (अ‍ॅक्वा लाईन) ची सेवा आज रात्रभर सुरू राहणार आहे. यामुळे रस्त्यांवरील वाहतुकीचा ताण कमी होण्यास मदत होणार आहे.

दक्षिण मुंबईत अवजड वाहने आणि खासगी बसेसना ‘नो एन्ट्री’

रस्त्यांवरील वाहतूक कोंडी टाळण्यासाठी प्रशासनाने दक्षिण मुंबईत सकाळी ११ वाजेपासून दुसऱ्या दिवशी सकाळी ८ वाजेपर्यंत अवजड वाहने आणि प्रवासी खासगी बसेसच्या प्रवेशावर पूर्ण बंदी घातली आहे. (दूध, भाजीपाला, रुग्णवाहिका, बेकरी उत्पादने आणि स्कूल बस यांसारख्या अत्यावश्यक सेवांना यातून सूट देण्यात आली आहे.) तसेच, या वाहनांना रस्त्यावर पार्क करण्यास मनाई असून केवळ अधिकृत ‘पे अँड पार्क’च्या ठिकाणीच पार्किंगची मुभा आहे.

३८३ हून अधिक कृत्रिम तलाव; QR Code ने शोधा जवळचे विसर्जन स्थळ

महापालिकेने शहरात यंदा ६७ नैसर्गिक स्थळांसोबतच ३८३ हून अधिक कृत्रिम तलावांची निर्मिती केली आहे. मुख्य चौपाट्यांवरील गर्दी टाळण्यासाठी नागरिकांना आपल्या घराजवळील विसर्जन स्थळ सहज शोधता यावे, यासाठी पालिकेने Google Maps आणि QR Code ची विशेष सुविधा उपलब्ध करून दिली आहे.

प्रशासनाने सर्व भाविकांना शिस्त पाळण्याचे, वाहतूक आणि सुरक्षेच्या नियमांचे पालन करण्याचे तसेच लहान मुले व ज्येष्ठांची विशेष काळजी घेण्याचे आवाहन केले आहे. लाडक्या बाप्पाला सुरक्षित आणि शांततेत निरोप देण्यासाठी संपूर्ण मुंबई नगरी सज्ज झाली आहे.

डिजिटल यंत्रणेद्वारे नियंत्रण कक्षातून देखरेख

मुंबईतील विसर्जन व्यवस्थेवर लक्ष ठेवण्यासाठी नियंत्रण कक्षात डिजिटल मोबाइल रेडिओ आणि हॅम रेडिओची सुविधा उपलब्ध करून देण्यात आली आहे. त्यामुळे विविध यंत्रणांमध्ये जलद संवाद साधणे शक्य होणार आहे. अग्निशमन दल, मुंबई पोलीस, आरोग्य विभाग, किनारी सुरक्षा यंत्रणा आणि राष्ट्रीय आपत्ती प्रतिसाद दलाशी समन्वय ठेवण्याची व्यवस्था करण्यात आली आहे. आपत्कालीन परिस्थितीत संबंधित यंत्रणांना तातडीने माहिती पोहोचवण्यावर भर देण्यात येत आहे.

गिरगाव चौपाटीसह प्रमुख ठिकाणांवर विशेष नजर

गिरगाव चौपाटीसह मुंबईतील प्रमुख नैसर्गिक विसर्जन स्थळांवर मोठ्या प्रमाणात भाविकांची गर्दी होण्याची शक्यता आहे. त्यामुळे या ठिकाणी सुरक्षेसोबतच गर्दी नियंत्रण आणि आपत्कालीन प्रतिसाद यंत्रणा सज्ज ठेवण्यात आली आहे.

चौपाट्यांवरील CCTV कॅमेऱ्यांच्या माध्यमातून थेट निगराणी ठेवली जाणार आहे. गर्दीची स्थिती, संभाव्य आपत्कालीन घटना आणि विसर्जन प्रक्रियेवर नियंत्रण कक्षातून लक्ष ठेवण्यात येणार आहे.

भाविकांच्या सुरक्षिततेला प्राधान्य

गणपती विसर्जनाचा उत्सव उत्साहात पार पडावा आणि भाविकांची सुरक्षितता अबाधित राहावी, यासाठी पालिकेकडून विविध पातळ्यांवर तयारी करण्यात आली आहे. नागरिकांनी शक्य असल्यास जवळच्या कृत्रिम तलावांचा वापर करावा आणि प्रशासनाकडून देण्यात येणाऱ्या सूचनांचे पालन करावे, असे आवाहन करण्यात आले आहे.
अनंत चतुर्दशीच्या दिवशी मुंबईत मोठ्या प्रमाणात गणेश विसर्जन होणार असल्याने प्रशासनाची ही तयारी महत्त्वाची ठरणार आहे. विसर्जनाच्या पार्श्वभूमीवर मुंबईतील प्रमुख चौपाट्या आणि विसर्जन स्थळांवर आता प्रशासनाची करडी नजर असणार आहे

बाप्पाला निरोप देण्यासाठी मुंबई सज्ज

गणेशोत्सवाच्या 10 दिवसांनंतर आज लाडक्या गणरायाला निरोप देण्याची वेळ आली आहे. त्यामुळे मुंबईतील गणेशभक्तांमध्ये उत्साहाचे वातावरण असून, विविध मंडळांच्या विसर्जन मिरवणुका टप्प्याटप्प्याने पुढे सरकत आहेत.
बोरीवलीतून ‘उपनगरचा राजा’ मार्गस्थ झाल्यानंतर आता मुंबईतील इतर प्रमुख गणपती मंडळांच्या विसर्जन मिरवणुकांकडे सर्वांचे लक्ष लागले आहे. ढोल-ताशांचा गजर, गुलाल आणि बाप्पाच्या जयघोषात मुंबईकर आपल्या लाडक्या गणरायाला निरोप देत आहेत. ‘गणपती बाप्पा मोरया, पुढच्या वर्षी लवकर या’च्या जयघोषाने आज मुंबईतील रस्ते दुमदुमणार आहेत.