आज २५ सप्टेंबर २०२६ रोजी अनंत चतुर्दशीच्या दिवशी बाप्पाला निरोप देण्यासाठी मुंबईच्या विविध भागांतून मोठ्या संख्येने भाविक घराबाहेर पडत आहेत. विसर्जन मिरवणुका आणि गणेशोत्सवाच्या सांगता सोहळ्यामुळे मुंबईतील अनेक भागांमध्ये रात्री उशिरापर्यंत गर्दी राहण्याची शक्यता आहे. मुंबई मेट्रोकडून अशा वेळी मुंबईकरांच्या परतीच्या प्रवासासाठी महत्त्वाची सुविधा उपलब्ध करून देण्यात आली आहे. मुंबई मेट्रो लाईन-3 म्हणजेच Aqua Line ची सेवा अनंत चतुर्दशीला रात्रभर सुरू ठेवण्याचा निर्णय घेण्यात आला आहे.

गणेशभक्तांसाठी मोठी सुविधा

अनंत चतुर्दशीच्या दिवशी मुंबईत मोठ्या प्रमाणावर गणेशमूर्तींचे विसर्जन केलं जाणार आहे. विविध सार्वजनिक गणेशोत्सव मंडळांच्या विसर्जन मिरवणुका शहरातील प्रमुख मार्गांवरून जातात. रात्री उशिरापर्यंत मुंबईत सर्वञ गर्दी पाहायला मिळते. गिरगाव चौपाटीसह मुंबईतील विविध विसर्जन स्थळांवर मोठ्या संख्येने गणेशभक्त दाखल होतात.

अनेक मोठ्या गणेशमूर्तींच्या विसर्जन मिरवणुका रात्री उशिरापर्यंत सुरू राहतात, तर काही ठिकाणी विसर्जन पहाटेपर्यंत सुरू असतं. अशा परिस्थितीत विसर्जनासाठी बाहेर पडलेल्या भाविकांना रात्री घरी परतताना सार्वजनिक वाहतुकीची सुविधा उपलब्ध असणे महत्त्वाचे ठरते. याच पार्श्वभूमीवर मुंबई मेट्रो-3ची सेवा रात्रभर सुरू ठेवण्याचा निर्णय घेण्यात आलाय.

मुंबई मेट्रो लाईन-3 रात्रभर धावणार

मुंबई मेट्रो लाईन-3 म्हणजे Aqua Line च्या विशेष रात्रीच्या सेवेमुळे विसर्जन सोहळ्यात रात्री उशिरापर्यंत सहभागी होणाऱ्या नागरिकांना मोठा दिलासा मिळणार आहे. दक्षिण मुंबई तसेच मेट्रो-3 मार्गावरील विविध भागांमध्ये प्रवास करणाऱ्या नागरिकांना या विशेष सेवेचा लाभ घेता येणार आहे.विसर्जन मिरवणुका पाहण्यासाठी किंवा त्यामध्ये सहभागी होण्यासाठी गेलेल्या गणेशभक्तांना सोहळा संपल्यानंतर घरी परतताना या मेट्रो सेवेचा नक्कीच उपयोग होऊ शकतो.

रस्त्यांवरील वाहतुकीचा ताण कमी होण्यास मदत

अनंत चतुर्दशीच्या दिवशी मुंबईतील रस्त्यांवर मोठी गर्दी होते. विसर्जन मिरवणुकांमुळे अनेक ठिकाणी वाहतूक निर्बंध लागू केले जातात. काही मार्गांवर वाहतुकीत बदल करण्यात आला आहे. तसेच आज अनेक रस्त्यांवर वाहनांची मोठी गर्दी पाहायला मिळणार त्यामुळे ही सोय करण्यात आली आहे. अशा परिस्थितीत रात्रभर मेट्रो सेवा उपलब्ध राहिल्याने नागरिकांना खासगी वाहनांऐवजी सार्वजनिक वाहतुकीचा पर्याय निवडता येणार आहे.

त्यामुळे विसर्जनाच्या दिवशी रस्त्यांवरील वाहतुकीचा ताण कमी करण्यासही मदत होण्याची शक्यता आहे. रात्री उशिरापर्यंत सुरू राहणाऱ्या विसर्जन मिरवणुका आणि बाप्पाच्या निरोप सोहळ्यानंतर घरी परतणाऱ्या भाविकांसाठी ही सुविधा विशेष महत्त्वाची ठरणार आहे.

प्रवाशांनी ‘या’ गोष्टी तपासणे महत्त्वाचे

मेट्रोची विशेष सेवा उपलब्ध असली तरी प्रवाशांनी प्रवास करण्यापूर्वी काही महत्त्वाच्या बाबी तपासणे आवश्यक आहे. मेट्रोच्या विशेष सेवेची नेमकी वेळ, गाड्यांची वारंवारता, संबंधित स्थानकांची उपलब्धता तसेच स्थानकांवरील प्रवेश आणि निर्गमन व्यवस्था याबाबतच्या अधिकृत सूचना प्रवाशांनी पाहाव्यात. अनंत चतुर्दशीच्या दिवशी गर्दी मोठ्या प्रमाणात असण्याची शक्यता असल्याने प्रवाशांनी मेट्रो प्रशासनाकडून जारी करण्यात येणाऱ्या सूचनांचे पालन करणेही महत्त्वाचे ठरणार आहे.