सामाजिक कार्यकर्ते सोनम वांगचूक यांना सफदरजंग रुग्णालयात दाखल करण्यात आलं आहे. दिल्ली पोलिसांनी दखल घेत त्यांना तातडीने रुग्णालयात दाखल केलं आहे. 20 दिवसांच्या उपोषणानंतर कोर्ट आणि वैद्यकीय तज्ज्ञांच्या सल्ल्यानुसार दिल्ली पोलिसांनी त्यांना रुग्णालयात दाखल केले.सोनम वांगचूक यांना रुग्णालयात दाखल केल्यानंतर उपोषणस्थळी असलेल्या आंदोलकांनी आक्रमक भूमिका घेतली आहे. सोनम वांगचूक यांच्यानंतर आता अभिजीत दीपके यांनी उपोषण करणार असल्याची घोषणा केली आहे.

गितांजली वांगचूक यांचा आक्रमक पवित्रा

तर रुग्णालयात दाखल केलेल्या सोनम वांगचूक यांच्या पत्नी गितांजली यांनीही आक्रमक पवित्रा घेतला आहे. “माझ्या संमतीशिवाय कोणतंही औषध देऊ नका” असं म्हणत रुग्णालयाला अल्टिमेटम दिला आहे. आपल्या ट्विटर अकाऊंटवरून सोनम वांगचुक यांच्या पत्नी गीतांजली जे अंग्मो यांनी ट्वीट देखील केलं आहे.

परवानगीशिवाय सोनम यांना कोणतेही औषध देऊ नये

गीतांजली वांगचूक यांनी म्हटलं की, ‘माझी, कुटुंबातील सदस्य आणि त्यांच्या डॉक्टरांच्या परवानगीशिवाय सोनम यांना कोणतेही औषध तोंडावाटे आणि शिरेवाटे देऊ नये’. सध्या त्या स्वत: सफदरजंग रुग्णालयात उपस्थित आहेत. त्या वांगचूक यांच्या प्रकृतीवर लक्ष ठेवून आहेत.तसेच मिळालेल्या माहितीनुसार,सोनम वांगचूक यांची उपोषणाच्या 21 व्या दिवशी तब्येत बिघडली, असं सांगण्यात येत आहे. त्यानंतर त्यांना शनिवारी दिल्लीच्या सफदरजंग रुग्णालयात दाखल केले. दिल्ली पोलिसांनी सांगितले की, डॉक्टरांचा सल्ला आणि दिल्ली हायकोर्टाच्या निर्देशानुसार त्यांना रुग्णालयात दाखल करण्यात आलं.

I am at Safdarjung hospital in Delhi where @Wangchuk66 has been admitted. Nothing should be administered to him orally or intravenous without take consent from me, his family and his doctors who have been monitoring his health for the past 20 days.

— Gitanjali J Angmo (@GitanjaliAngmo) July 18, 2026

वांगचुक २८ जूनपासून उपोषणाला बसले आहेत

नीट (NEET) परीक्षेतील गैरप्रकार आणि त्यामुळे झालेल्या विद्यार्थ्यांच्या मृत्यू प्रकरणाच्या निषेधार्थ जंतर-मंतर येथे सुरू असलेल्या आंदोलनाला पाठिंबा देण्यासाठी वांगचुक २८ जूनपासून उपोषणाला बसले होते.

शरीरातील पाण्याच्या कमतरतेमुळे वांगचुक अशक्त

दरम्यान दिल्लीचे डेप्युटी कमिशनर सचिन शर्मा यांनी पीटीआयला दिलेल्या माहितीनुसार, उच्च न्यायालयाच्या आदेशानुसार वांगचुक यांना रुग्णालयात दाखल करण्यात आलं असून त्यांच्यावर आवश्यक उपचार सुरू असल्याचं सांगितलं.तसेच रुग्णालयाच्या सूत्रांनी दिलेल्या माहितीनुसार, प्रदीर्घ उपोषण आणि शरीरातील पाण्याच्या कमतरतेमुळे वांगचुक अशक्त झाल्याचं सांगण्यात आलं आहे.

अभिजीत दीपकेंची आमरण उपोषणाची घोषणा

वांगचूक यांची तब्येत बिघडल्यानं त्यांना रुग्णालयात दाखल करताच आक्रमक पवित्रा घेत कॉकरोच जनता पक्षाचे संस्थापक अभिजीत दीपके यांनी शनिवारी आमरण उपोषणाची घोषणा केली. त्यांनी ‘एक्स’वर पोस्ट करत म्हटलं की,’मी आजपासून आमरण उपोषण सुरू करत आहे’.तसेच सोनम वांगचूक यांच्या मेडिकल टीमने त्यांच्या तब्येतीविषयी महत्वाची माहिती दिली आहे. डॉक्टरांच्या माहितीनुसार, वांगचूक यांची तब्येत आता स्थिर आहे. त्यांच्या वैद्यकीय चाचण्या देखील करण्यात आल्या आहेत. त्यांचा रक्तदाब आणि साखर कमी झाली आहे. त्यांचा ईसीजी रिपोर्ट देखील नॉर्मल आहे.

मात्र आताची परिस्थिती पाहता दिल्लीतील जंतर-मंतर मैदानावरील उपोषण चिघळण्याची शक्यता नाकारता येत नाही.