अमोल भालेराव
कॉकरोच जनता पार्टी (CJP) चे अभिजित दीपके यांच्या नेतृत्वाखाली आज २ ऑक्टोबर २०२६ गांधी जयंतीच्या दिवशी मुंबईतील शिवाजी पार्क येथे मुख्य निवडणूक आयुक्त ज्ञानेश कुमार यांच्या राजीनाम्यासाठी आंदोलन आयोजित करण्यात येणार आहे. आज संध्याकाळी ४ वाजल्यापासून मुंबईतील शिवाजी पार्क गेट क्रमांक ६ येथे हे आंदोलन करण्याचं ठरलं आहे. माञ मुंबई पोलिसांनी या आंदोलनाला परवानगी नाकारली आहे. तरीही आंदोलनावर ठाम असल्याचे सीजेपीने स्पष्ट केले आहे.
शिवाजी पार्क आणि आजूबाजूच्या परिसरात सुरक्षा व्यवस्था वाढवली
आंदोलनाच्या शक्यतेमुळे शिवाजी पार्क आणि आजूबाजूच्या परिसरात सुरक्षा व्यवस्था कडक करण्यात आली आहे. मोठ्या प्रमाणात पोलीस बंदोबस्त तैनात करण्यात आला आहे. तसेच पार्लमेंट स्ट्रीट पोलीस ठाण्याबाहेर सुरक्षा व्यवस्था वाढवण्यात आली आहे. दरम्यान काही वेळापूर्वी, सीजेपीचे संयोजक अभिजित दीपके यांना थोड्या वेळासाठी ताब्यात घेण्यात आले होते. मात्र, त्यानंतर थोड्याच वेळात त्यांची सुटका करण्यात आली.
संध्याकाळी ४ वाजता शिवाजी पार्कमध्ये आंदोलन
सीजेपीचे प्रवक्ते सौरभ दास यांनी देखील सोशल मीडियावर एक संदेश शेअर करून संध्याकाळी ४ वाजता शिवाजी पार्कमध्ये एकत्र येण्याचे अंतिम आवाहन केले आहे. त्यांनी लिहिले, “ज्ञानेश, आता पुरे झाले.” छत्रपती शिवाजी पार्कच्या आसपासच्या रेल्वे स्थानकांवरही सुरक्षा व्यवस्था कडक करण्यात आली आहे.या आंदोलनाचे पडसाद आता दिल्लीतही पाहायाला मिळत आहेत.
दिल्लीतील जंतर मंतर परिसरात आंदोलनाला सुरुवात
सकाळी ११ वाजल्यापासून दिल्लीतील जंतर मंतर परिसरात आंदोलनाला सुरुवात झाली आहे. दरम्यान, आम आदमी पक्षाचे अध्यक्ष सौरभ भारद्वाज यांना दिल्ली पोलिसांनी ताब्यात घेतले आहे. ते आंदोलनात सहभागी होण्यासाठी आले होते.दिल्लीतील विरोध पक्ष, आप आणि विद्यार्थी संघटना या आंदोलनात सहभागी होत आहेत. आप नेते सौरभ भारद्वाज जंतर मंतरवर पोहोचताच त्यांना ताब्यात घेण्यात आले.
VIDEO | Delhi: Police detain protesters during a demonstration demanding the resignation of Chief Election Commissioner Gyanesh Kumar at Jantar Mantar.
(Full video available on PTI Videos – https://t.co/d8jp61yd2p) pic.twitter.com/fyDF6qMfm5
— Press Trust of India (@PTI_News) October 2, 2026
पोलिसांकडून आंदोलकांची धरपकड सुरु
त्यामुऴे पुन्हा एकदा दिल्लीतील जंतर-मंतरवर आंदोलनाचे नारे दिसत असून पोलिसांकडून आंदोलकांची धरपकड सुरु करण्यात आली आहे. खबरदारी म्हणून जंतर मंतरवर पोलीस आणि आरएएफचे जवान तैनात करण्यात आले आहेत. एवढंच नाही तर जवळच्या ११ मेट्रो स्थानकांचे प्रवेश आणि बाहेर पडण्याचे दरवाजे पुढील सूचना मिळेपर्यंत बंद करण्यात आले आहेत. यामध्ये जनपथ, पटेल चौक, सेंट्रल सेक्रेटरीएट, राजीव चौक, सेवा तीर्थ, मंडी हाऊस आणि लोक कल्याण मार्ग मेट्रो स्थानकांचा समावेश आहे.
दिल्लीत कलम १६३ लागू
दिल्ली पोलिसांनी दिलेल्या माहितीनुसार, जंतर मंतर आणि त्याच्या आजूबाजूचा परिसर आठ ते नऊ झोनमध्ये विभागण्यात आला असून, सुरक्षेची देखरेख करण्यासाठी प्रत्येक झोनमध्ये एक वरिष्ठ आयपीएस अधिकारी तैनात करण्यात आला आहे. तसेच दिल्लीत कलम १६३ लागू, निदर्शने, मिरवणुका आणि सभांवर बंदी घालण्यात आली आहे.
ज्ञानेश कुमार यांच्या विरोधात जंतर मंतर येथे होणाऱ्या प्रस्तावित आंदोलनाच्या पार्श्वभूमीवर, दिल्लीत भारतीय नागरी सेवा संहितेचे (BNSS) कलम १६३ लागू करण्यात आले आहे. यानुसार निदर्शने, मिरवणुका किंवा सभा घेण्यास मनाई आहे. तसेच, लोकांच्या एकत्र येण्यावरही बंदी घालण्यात आली आहे.
CJP च्या प्रमुख मागण्या
मुख्य निवडणूक आयुक्त ज्ञानेश कुमार यांचा राजीनामा, त्यांच्यावर गुन्हेगारी स्वरूपाचे खटले दाखल करणे, तसेच मतदार याद्यांमधील ‘एसआयआर’ (SIR) प्रक्रिया गोठवणे या प्रमुख मागण्या आहेत.
