मुंबई : मढ परिसरातील जरिमरी माता मंदिरातून दोन सोन्याचे मंगळसूत्र चोरी झाल्याची धक्कादायक घटना समोर आली आहे. याबाबतची माहिती भाजप कार्यकर्ते प्रमोद यादव यांनी जागृत महाराष्ट्र न्यूजला दिली.

प्रमोद यादव यांनी सांगितले की, जरिमरी माता मंदिरातील दोन सोन्याच्या मंगळसूत्रांची चोरी झाली असून या घटनेमुळे परिसरातील नागरिकांमध्ये चिंता व्यक्त केली जात आहे. मंदिर परिसरात सुरक्षा व्यवस्था वाढविण्याची मागणीही नागरिकांकडून करण्यात येत आहे.

तसेच मढ येथील शिवाजी नगर गेट क्रमांक २ परिसरात मोबाईल चोरीच्या घटनांमध्ये मोठ्या प्रमाणात वाढ झाल्याचा आरोपही त्यांनी केला. नागरिकांच्या मोबाईल चोरीच्या अनेक तक्रारी समोर येत असून यामुळे स्थानिक रहिवाशांमध्ये भीतीचे वातावरण निर्माण झाले आहे.

परिसरात वाढत्या चोरीच्या घटनांवर पोलिस प्रशासनाने तात्काळ लक्ष देऊन गस्त वाढवावी, सीसीटीव्ही यंत्रणांची तपासणी करावी आणि चोरट्यांवर कठोर कारवाई करावी, अशी मागणी स्थानिक नागरिक आणि सामाजिक कार्यकर्त्यांकडून करण्यात येत आहे.

मढ परिसरातील वाढत्या चोरीच्या घटनांमुळे कायदा व सुव्यवस्थेचा प्रश्न पुन्हा एकदा ऐरणीवर आला असून पोलिस प्रशासन यावर कोणती कारवाई करते याकडे नागरिकांचे लक्ष लागले आहे…