सप्टेंबर महिन्याच्या शेवटच्या आठवड्यांपासूनच महाराष्ट्राच्या हवामानात मोठा बदल जाणवू लागला आहे. राज्यात पावसाची उघडीप मिळताच उन्हाचा कडाका चांगलाच वाढला असून, अनेक भागांत तापमानात वाढ झाली आहे. सकाळपासूनच उकाडा जाणवत असून दुपारच्या वेळी उन्हाचे चटके नागरिकांना जाणवत असल्याचा अनुभव येत आहे.

आता ऑक्टोबरच्या सुरुवातीपासूनही काही ठिकाणी तापमानात वाढ होत आहे. सप्टेंबरअखेर राज्यात सरासरीपेक्षा कमी पाऊस झाल्याने अनेक भागांत पावसाची तूट निर्माण झाली आहे. त्यामुळे शेतीसमोरही आव्हाने वाढली असून, आता ऑक्टोबरच्या सुरुवातीलाच नागरिकांना उन्हाचे चटके जाणवू लागले आहेत.ज्याला’ऑक्टोबर हिट’ असही म्हणतात.

‘ऑक्टोबर हिट’मुळे मुंबईकर हैराण

मुंबईतही उन्हाळ्यासारखं तापमान होत असल्याने मुंबईकर उकाड्याने हैराण झाले आहेत. मुंबईतील वाढत्या तापमान आणि आर्द्रतेमुळे नागरिकांना उन्हाळ्यासारखा त्रास आणि प्रचंड उकाडा जाणवत आहे.मुंबई आणि उपनगरांमध्ये अधूनमधून ढगाळ वातावरण निर्माण होण्याची शक्यता आहे.पण वातावरणातील गर्मी माञ कायम जाणवतेय.

कोकणात काही ठिकाणी पावसाची शक्यता

2 ऑक्टोबर रोजी कोकणातील काही भागांत हलक्या ते मध्यम पावसाच्या सरी पडण्याची शक्यता आहे. रायगड, रत्नागिरी आणि सिंधुदुर्ग जिल्ह्यांत काही ठिकाणी मेघगर्जनेसह पावसाच्या सरींची शक्यता आहे. मात्र, संपूर्ण कोकणात मुसळधार पाऊस पडण्याची शक्यता सध्या दिसत नाही. त्यामुळे काही भाग वगळता हवामान प्रामुख्याने कोरडे राहण्याची शक्यता आहे

उत्तर महाराष्ट्रात उष्ण आणि कोरडे वातावरण

उत्तर महाराष्ट्रातील अनेक भागांत अंशतः ढगाळ, मात्र प्रामुख्याने कोरडे हवामान राहण्याचा अंदाज आहे. पावसाची तूट कायम असल्याने शेतकऱ्यांच्या चिंतेत भर पडली आहे. आगामी काही दिवसांतही पावसाची उघडीप कायम राहिल्यास शेतीवर त्याचा परिणाम होण्याची शक्यता आहे.

पश्चिम महाराष्ट्रात तुरळक सरी

अहिल्यानगर, पुणे, सातारा, सांगली आणि कोल्हापूर परिसरात काही ठिकाणी हलक्या पावसाच्या सरी पडू शकतात. मात्र, सध्या मोठ्या पावसाचा इशारा नसल्याने पश्चिम महाराष्ट्रातील बहुतांश भागांत उष्ण आणि दमट वातावरण राहण्याची शक्यता आहे. दिवसा तापमान वाढल्याने ‘ऑक्टोबर हिट’ चा अनुभव अधिक तीव्र होऊ शकतो.

मराठवाड्यात पावसाची शक्यता आहे

छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव जिल्ह्यांत पावसाने उघडीप घेतली आहे. सध्या या भागासाठी मोठ्या पावसाचा इशारा नाही. काही ठिकाणी ढगाळ वातावरण राहू शकते, मात्र उष्णता आणि दमटपणा जाणवण्याची शक्यता आहे. तापमानात वाढ झाल्यास शेतीसह नागरिकांनाही उकाड्याचा त्रास होऊ शकतो.

विदर्भातही पावसाचा जोर कमी अन् उष्ण हवामान

अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर आणि वाशिम या भागांतही सध्या मोठ्या पावसाचा इशारा नाही. त्यामुळे पुढील काही दिवस उष्ण हवामान राहण्याची शक्यता आहे.

परतीचा मान्सून ठरणार महत्त्वाचा

2 ऑक्टोबरला कोकण आणि घाटमाथ्याच्या काही भागांत मेघगर्जनेसह पावसाच्या सरींची शक्यता असली तरी महाराष्ट्रातील बहुतांश भागांत पावसाचा जोर कमी राहण्याचे संकेत आहेत. सप्टेंबरअखेरची पावसाची तूट आणि ऑक्टोबरच्या सुरुवातीपासून वाढणारी उष्णता यामुळे शेती आणि नागरिकांसमोर वेगळी आव्हाने निर्माण झाली आहेत.