पुण्यात MPSCचं आंदोलन सुरु आंदोलन गाजवलं ते म्हणजे कोल्हापूरचा विवेकानंद पाटीलने. विवेकानंदने आपल्या भाषणामुळे आंदोलन तर गाजवलं पण सोबतच त्याच्या मिश्कील भाषणामुळे सोशल मीडियावर त्याचा चाहता वर्ग वाढत चालला आहे. त्याच्या भाषणाचे व्हिडीओ प्रचंड व्हायरल झाले आहेत. पण आता त्याच्या या भाषणाचे चक्क नेतेही चाहते झालेत.

विवेकानंदचं घर पाहून नेत्याच्या डोळ्यात पाणी

आपल्या दमदार भाषणाने ज्वलंत प्रश्न चव्हाट्यावर आणणारा विवेकानंद पाटीलची अभ्यासपूर्ण मांडणी, रांगडी भाषा आणि परखड मताची एका नेत्याला खरोखरच भूरळ पडली. पण जेव्हा त्यांनी त्याचे घर पाहिले तेव्हा माञ त्यांच्या डोळ्यात पाणी आले. ते म्हणजे काँग्रेस नेते विश्वजीत कदम

“मला माझ्या परिस्थितीचं भांडवल करायचं नाही”

दरम्यान, काँग्रेस नेते विश्वजीत कदम यांनी एमपीएससी विद्यार्थ्यांच्या आंदोलनाला भेट दिली होती. यावेळी त्यांनी विवेकानंदच्या घराचा उल्लेख करत, त्याची परवानगी असेल तर त्याच्या आई-वडिलांसाठी चांगले घर बांधण्याची जबाबदारी आपण घेऊ, अशी भूमिका मांडली होती. मात्र विवेकानंद पाटीलने ही मदत नम्रपणे नाकारली. “मला माझ्या परिस्थितीचं भांडवल करायचं नाही,” अशी भूमिका त्याने घेतली. विश्वजीत कदम यांच्या प्रस्तावाबद्दल आभार व्यक्त करताना, घर आज नाही तर उद्या आपण स्वतः बांधू शकतो, असेही त्याने स्पष्ट केले.

मातीने सारवलेल्या भींती, शेणाची जमीन…

आंदोलनात सहभागी विद्यार्थ्यांना आंदोलनात खेळवून ठेवणारा विवेकानंद पाटील हा मूळचा राधानगरी तालुक्यातील माजगाव या छोट्याशा गावातला तरुण आहे. शेती करणारे आई वडील, छोटसं पत्र्याचे घर. मातीने सारवलेल्या भींती, शेणाची जमीन आणि त्यात पुस्तके असे अतिशय छोटे विवेकानंदचे घर आहे. तसेच वक्तृत्व स्पर्धेतून मिळालेल्या बक्षिसाची मांडणी असं विवेकानंदच्या घरातील दृश आहे. हे दृश्य पाहून विश्वजीत कदम हे भावूक झाले आहेत. त्यांनी थेट विवेकानंदला घर बांधून देणार असल्याचे म्हटले आहे.

काय म्हणाले विश्वजीत कदम?

विश्वजीत कदम म्हणाले की, विवेकानंद पाटीलला मी घर बांधून देणारच. त्याच्यासाठी नाही निदान त्याच्या आई वडिलांसाठी. तो प्रसिद्ध झाला म्हणून हे मी करत नाही. त्याचं घर पाहून मी भावनिक झालो. माझे वडील पण अशाच घरात राहायचे. वडील सांगायचे आठवड्यातून एक दिवस घरी अंड खायला भेटायचं. मी भावनिकतेतून म्हटल की घर बांधून देतो.

पुढे मुख्यमंत्र्यांना विनंती करत विश्वजीत कदम म्हणाले की, एमपीएससी विद्यार्थ्यांचा प्रश्न सोडवला जावा अशी आमची मागणी आहे. विद्यार्थ्यांची दखल घ्यायला सरकार तयार नाही. मुख्यमंत्री यांना विनंती आहे की त्यांनी हा प्रश्न सोडवावा.

कोण आहे विवेकानंद पाटील?

आपल्या खास कोल्हापूरी लकबीत, रांगड्या शैलीत अस्सल कोल्हापुरी स्वॅगने अवघ्या काही काळातच विवेकानंद पाटील हा एमपीएससी आंदोलनातील विद्यार्थ्यांच्या गळ्यातील ताईत झाला आहे. त्याचा दमदार भाषणाने राज्याचे लक्ष वेधले आहे. सोशल मीडियावर त्याचा जणू स्वॅग सुरू आहे. २४ वर्षांचा विवेकानंद पाटील पुण्यात स्पर्धा परीक्षांची तयारी करणारा विद्यार्थी आहे.