मुंबई – महाराष्ट्राच्या राजकारणात आज पुन्हा एकदा मोठी हालचाल घडली आहे. मनसे अध्यक्ष राज ठाकरे यांनी आज सायंकाळी उद्धव ठाकरे यांच्या मातोश्री निवासस्थानी भेट दिली. विशेष म्हणजे, ही भेट गेल्या तीन महिन्यांतील दुसरी भेट असल्याने राजकीय वर्तुळात चर्चेला चांगलाच ऊत आला आहे.

या भेटीदरम्यान दोन्ही कुटुंबातील सदस्यही उपस्थित होते. उद्धव ठाकरे यांच्या पत्नी रश्मी ठाकरे, राज ठाकरे यांच्या पत्नी शर्मिला ठाकरे, तसेच आदित्य ठाकरे हे देखील या वेळी उपस्थित होते. दोन्ही कुटुंबांनी जवळपास एक तास मनमोकळ्या गप्पा केल्याचे सूत्रांनी सांगितले.

राज ठाकरे आणि उद्धव ठाकरे यांच्या नात्यात मागील काही वर्षांत तणाव निर्माण झाला होता. शिवसेनेच्या फुटीनंतर दोन्ही भाऊ दूर झाले होते. मात्र, मागील काही महिन्यांपासून दोघांमध्ये सौहार्दाचे वातावरण निर्माण होत आहे. याआधी जून महिन्यातही राज ठाकरे यांनी मातोश्रीवर भेट देऊन दीर्घ चर्चा केली होती.

   या भेटीत नेमकी काय चर्चा झाली याबाबत अधिकृत माहिती देण्यात आलेली नाही. मात्र, सूत्रांच्या माहितीनुसार मुंबईतील सध्याच्या राजकीय घडामोडी, आगामी मनपा  निवडणुका आणि मराठी मतदारसंघातील भूमिका यावर प्राथमिक चर्चा झाल्याची शक्यता आहे.
दोन्ही ठाकरे बंधूंमध्ये पुन्हा जवळीक वाढत असल्याचे संकेत या भेटीतून मिळत आहेत.