मुंबई, दि. २० : बृहन्मुंबई महानगरपालिकेच्या सभागृहातील कामकाज आता नागरिकांसाठी थेट (लाईव्ह) प्रसारित करण्यास सुरुवात करण्यात आली असून, ही पारदर्शकतेच्या दृष्टीने अत्यंत महत्त्वाची पायरी मानली जात आहे.

नगरसेवक हैदर अली असलम शेख यांनी दिनांक 02/03/2026 रोजी महापौर यांना पत्र देत बीएमसीच्या सभांचे युट्युब व इतर डिजिटल माध्यमांवर लाईव्ह स्ट्रिमिंग सुरू करण्याची मागणी केली होती. या मागणीचा सकारात्मक विचार करून प्रशासनाने अखेर लाईव्ह प्रसारणाची सुविधा सुरू केली आहे.

या उपक्रमामुळे आता मुंबईतील नागरिकांना महापालिकेच्या सभांमधील निर्णय प्रक्रिया, चर्चासत्रे आणि विविध मुद्द्यांवरील मते थेट पाहता येणार आहेत. यामुळे प्रशासनातील पारदर्शकता वाढण्यासोबतच लोकशाही प्रक्रियेत नागरिकांचा सहभाग अधिक बळकट होईल.

नगरसेवक हैदर अली असलम शेख यांनी या निर्णयाचे स्वागत करताना सांगितले की, “बीएमसी ही देशातील सर्वात मोठी स्थानिक स्वराज्य संस्था असून, तिच्या कामकाजात पारदर्शकता असणे अत्यंत गरजेचे आहे. लाईव्ह स्ट्रिमिंगमुळे नागरिकांचा विश्वास वाढेल आणि प्रशासन अधिक जबाबदार बनेल.”
त्यांनी पुढे प्रशासनाचे आभार मानत सांगितले की, भविष्यातही नागरिकांच्या हितासाठी अशा सकारात्मक निर्णयांची अंमलबजावणी व्हावी.