तेलंगाना ACB ची मोठी कारवाई; DSP संकीरेड्डी भीम रेड्डींवर छापे, कोट्यवधींची बेहिशेबी संपत्ती उघड

हैदराबाद: तेलंगाना अँटी करप्शन ब्युरोने मोठी कारवाई करत पोलीस कॉम्प्युटर सर्व्हिसेसचे DSP संकीरेड्डी भीम रेड्डी यांच्याशी संबंधित ठिकाणांवर छापेमारी केली. उत्पन्नाच्या ज्ञात स्रोतांपेक्षा अधिक संपत्ती जमा केल्याच्या आरोपावरून ही कारवाई करण्यात आली आहे.

ACB च्या पथकांनी गुरुवारी एकाच वेळी 16 ठिकाणी झडती घेतली. यामध्ये DSP भीम रेड्डी यांचे निवासस्थान, तसेच त्यांच्या नातेवाईक, मित्र आणि सहकाऱ्यांशी संबंधित ठिकाणांचा समावेश असल्याची माहिती समोर आली आहे. वृत्तानुसार या कारवाईत 150 कोटी रुपयांहून अधिक संपत्ती उघड झाल्याचा दावा करण्यात आला आहे.

ACB च्या प्राथमिक तपासानुसार, संबंधित अधिकाऱ्याने आपल्या नोकरीच्या कार्यकाळात ज्ञात उत्पन्नापेक्षा अधिक मालमत्ता जमा केल्याचा संशय आहे. या संपत्तीमध्ये स्थावर मालमत्ता, आर्थिक गुंतवणूक, बँक व्यवहार आणि इतर कागदपत्रांची तपासणी सुरू असल्याची माहिती मिळत आहे.

भ्रष्टाचारविरोधी यंत्रणेच्या या कारवाईमुळे तेलंगानात मोठी खळबळ उडाली आहे. एका पोलीस अधिकाऱ्याकडे एवढ्या मोठ्या प्रमाणात संपत्ती आढळल्याने प्रशासनातील भ्रष्टाचाराविरोधात कठोर कारवाईची मागणी होत आहे.

या प्रकरणात ACB कडून पुढील तपास सुरू असून, संपत्तीचा स्रोत, आर्थिक व्यवहारांची साखळी आणि संबंधित व्यक्तींची भूमिका तपासली जाणार आहे.