महाडमध्ये किरकोळ उधारीवरून दुकानदाराला बेदम मारहाण, खांदा सटकला; वाचवायला गेलेल्या पत्नीचाही विनयभंग!

महाड: महाड शहर पोलीस ठाण्याच्या हद्दीत गुन्ह्यांचे प्रमाण दिवसेंदिवस वाढत असून, आता एका किराणा दुकानदाराला किरकोळ उधारीच्या कारणावरून बेदम मारहाण केल्याची धक्कादायक घटना समोर आली आहे. या मारहाणीत दुकानदाराचा हात खांद्यापासून सटकला असून, त्याच्या पत्नीशीही रस्त्यावर गैरवर्तन करून विनयभंग करण्यात आला आहे. याप्रकरणी आरोपी अरबाज अब्दुल लतिफ काझी याच्या विरोधात महाड शहर पोलीस ठाण्यात गंभीर स्वरूपाचे गुन्हे दाखल करण्यात आले आहेत.

सविस्तर माहिती अशी की, दिनांक ११ जुलै रोजी रात्री १० वाजताच्या सुमारास फिर्यादी इजाझ मोहिदिन चिपळूणकर (रा. पानसरी मोहल्ला, महाड) हे साळीवाडा नाका येथील त्यांच्या ‘मदिना किराणा जनरल स्टोअर्स’ या दुकानात असताना, त्यांनी आरोपी अरबाज काझी याच्याकडे मागील उधारीचे पैसे मागितले. याच गोष्टीचा राग आल्याने आरोपी अरबाजने फिर्यादी यांच्या कानाखाली मारून त्यांना खाली पाडले आणि लाथाबुक्कीने बेदम मारहाण केली. ही मारहाण एवढी जबर होती की, यामध्ये दुकानदाराचा एक हात खांद्यापासून सटकला. यानंतर आरोपीने दुकानातील सामानाची नासधूस केली व जीवे ठार मारण्याची धमकी देऊन तेथून पळ काढला.

या घटनेनंतर थोड्या वेळाने फिर्यादी यांच्या पत्नी पोलीस ठाण्यात तक्रार देण्यासाठी जात असताना, आरोपी अरबाजने साळीवाडा नाक्याजवळ असलेल्या ‘मुफीज बर्गर कॅफे’समोरील रस्त्यावर त्यांना गाठले. तिथे त्याने फिर्यादीच्या पत्नीशी अश्लील शिवीगाळ व गैरवर्तन करून त्यांचा विनयभंग केला.

या संपूर्ण घटनेबाबत आरोपी अरबाज काझी विरोधात महाड शहर पोलीस ठाण्यात भारतीय न्याय संहिता (BNS) कलम ११७(२), ११५ (२), १३१, ३५२, ३५१(२), ३५१ (३), ३२४(४), ७९ प्रमाणे गुन्हा दाखल करण्यात आला आहे. महाड शहर पोलीस ठाण्याचे पोलीस निरीक्षक नारायण एकशिंगे व सहाय्यक पोलीस निरीक्षक शिवराम खाडे यांच्या मार्गदर्शनाखाली पोलीस उपनिरीक्षक गरजे या गुन्ह्याचा अधिक तपास करीत आहेत.

#MahadCrime: महाडमध्ये कायदा-सुव्यवस्थेचे वाभाडे! किरकोळ उधारीचे पैसे मागितले म्हणून किराणा दुकानदाराला लाथाबुक्कीने बेदम मारहाण; दुकानदाराचा खांदा सटकला. धक्कादायक म्हणजे, तक्रार नोंदवण्यासाठी पोलीस ठाण्याकडे जाणाऱ्या दुकानदाराच्या पत्नीचाही भररस्त्यात विनयभंग!