मुंबईच्या छत्रपती शिवाजी महाराज टर्मिनस (CSMT) स्थानकात मंगळवारी सकाळी एक धक्कादायक घटना घडली आणि मोठा अपघात टळला. प्लॅटफॉर्म क्रमांक ७ वरून प्लॅटफॉर्म स्वच्छतेसाठी वापरली जाणारी इलेक्ट्रिक बॅटरीवर चालणारी क्लिनिंग मशीन अचानक रेल्वे रुळावर कोसळली.

या घटनेदरम्यान समोरून एक लोकल ट्रेन येत होती. मात्र, मोटरमनने विलक्षण प्रसंगावधान राखत वेळेत ट्रेन थांबवली आणि संभाव्य दुर्घटना टळली.

घटनेची माहिती मिळताच रेल्वे पोलिसांनी त्वरीत हस्तक्षेप करून मशीन रुळावरून हटवली. यामुळे प्लॅटफॉर्म क्रमांक ७ वरील सेवा काही काळासाठी विस्कळीत झाली होती. सुदैवाने, या घटनेत कोणतीही जखमी किंवा जीवितहानी झालेली नाही.

CSMT हे मध्य रेल्वेचे प्रमुख स्थानक असून, दररोज लाखो प्रवासी इथून प्रवास करतात. अशा ठिकाणी घडलेली ही घटना सुरक्षा व्यवस्थेवर गंभीर प्रश्न उपस्थित करते.

रेल्वे प्रशासनाने याप्रकरणी सखोल चौकशी सुरू केल्याची माहिती दिली असून, भविष्यात अशा घटना पुन्हा होऊ नयेत यासाठी सुरक्षा उपाय अधिक कडक करण्याचे आश्वासन देण्यात आले आहे.

या घटनेने पुन्हा एकदा सार्वजनिक ठिकाणी यंत्रणांची सुरक्षा आणि देखभाल किती महत्त्वाची आहे, हे अधोरेखित केले आहे.