अमोल भालेराव
मुंबईमध्ये पावसाने पुन्हा एकदा जोर धरला आहे. शुक्रवार सकाळपासून पावसाची रिमझिम सुरू असून काही भागांमध्ये मुसळधार पाऊस कोसळत आहे.मात्र यामुळे मुंबईकरांसाठी एक दिलासादायक बातमी समोर आली आहे. या दमदार पावसामुळे मुंबईला पाणीपुरवठा करणाऱ्या सात धरणांमधील पाणीसाठा 88 टक्क्यांवर पोहोचला आहे. बृहंमुंबई महापालिकेने एक्सवर ट्विट करत याबाबत माहिती दिली.
पाणीसाठ्यात लक्षणीय वाढ
मुंबई शहर आणि उपनगरांना दररोज पिण्याचे पाणी पुरवणाऱ्या सात मुख्य जलाशयांच्या पाणलोट क्षेत्रात झालेल्या दमदार पावसामुळे पाणीसाठ्यात लक्षणीय वाढ झाली आहे. १ ऑगस्ट २०२६ रोजी सकाळी ६ वाजेपर्यंत प्रसिद्ध केलेल्या अहवालानुसार, सातही धरणांमध्ये मिळून एकूण साठवण क्षमतेच्या ८८.४१ टक्के उपयुक्त जलसाठा उपलब्ध झाला आहे.
पाणलोट क्षेत्रात सलग होत असलेल्या मुसळधार पावसामुळे धरणांमधील पाणीपातळीत वेगाने सुधारणा झाली आहे. या जलसाठ्यामुळे मुंबईवरील संभाव्य पाणी संकटाची चिंता दूर झाली असून आगामी वर्षासाठी मुबलक पाणी मिळण्याचा मार्ग मोकळा झाला आहे.
सोमवारी पहाटे बीएमसीने धरणाचे दोन दरवाजे उघडले.
नैऋत्य मान्सूनमुळे होणाऱ्या जोरदार आवकामुळे ‘मिडल वैतरणा’ धरणातील पाण्याची पातळी २८२ मीटरवर पोहोचल्यानंतर, सोमवारी पहाटे बीएमसीने या धरणाचे दोन दरवाजे उघडले.
या धरणाची पूर्ण क्षमता पातळी २८५ मीटर असली, तरी बीएमसी जलाशय काठोकाठ भरू देत नाही. ‘अप्पर वैतरणा’ धरणातून जेव्हा पाणी सोडले जाते, तेव्हा होणारा अतिरिक्त आवक सामावून घेण्यासाठी महापालिकेचे अधिकारी जलाशयात काही प्रमाणात राखीव जागा ठेवतात.’मिडल वैतरणा’ धरणातून सोडलेले पाणी ‘मोडक सागर’मध्ये जाते. हे मुंबईला पिण्याचे पाणी पुरवणाऱ्या सात तलावांपैकी एक आहे.
🚰 मुंबईला पाणीपुरवठा करणाऱ्या ७ जलाशयांचा आज सकाळी ६ वाजेपर्यंतचा अहवाल #MyBMCUpdates pic.twitter.com/YD0j60Y4yT
— माझी Mumbai, आपली BMC (@mybmc) August 1, 2026
मुंबईकडे पुरेसा पाणीसाठा उपलब्ध
ही सुधारणा महिन्याच्या सुरुवातीच्या स्थितीच्या तुलनेत एक मोठी आणि सकारात्मक बदल दर्शवते. १ जुलै रोजी या सात तलावांमधील एकत्रित पाणीसाठा केवळ ७.१८ टक्क्यांवर घसरला होता, ज्यामुळे पाणी टंचाईबाबत चिंता निर्माण झाली होती.मात्र गेल्या काही आठवड्यांपासून सुरू असलेल्या नैऋत्य मान्सूनमुळे जलाशयांमध्ये मोठ्या प्रमाणात पाणी जमा झाले आहे. यामुळे पाणीटंचाईची भीती कमी झाली असून, आगामी महिन्यांसाठी मुंबईकडे पुरेसा पाणीसाठा उपलब्ध झाला आहे. तरीही, मुंबईत सध्या १० टक्के पाणीकपात लागू आहे. भातसा, अप्पर वैतरणा, मिडल वैतरणा, मोडक सागर, तानसा, विहार आणि तुळशी या सात जलाशयांमधून मुंबईला दररोज एकत्रितपणे सुमारे ४,००० दशलक्ष लिटर पाणी पुरवले जाते.
तलावांची स्थिती काय?
तुळशी तलाव १००% भरला
विहार तलाव १००% भरला
मोडकसागर तलाव १००% भरला
तानसा तलाव सुमारे ९९% भरला
मिडल वैतरणा जवळपास पूर्ण क्षमतेकडे
अप्पर वैतरणा चांगला जलसाठा
भातसा तलावात मोठ्या प्रमाणात जलसाठा उपलब्ध
